लोणी काळभोर : तृतीयपंथीय समाजाच्या राष्ट्रीय स्तरावरील संमेलनात दागिन्यांची विक्री करण्याच्या उद्देशाने हैदराबादहून लोणी काळभोरमध्ये आलेल्या एका सुवर्णकाराला तब्बल 2 लाख 38 हजार रुपयांचा आर्थिक फटका बसला आहे. प्रवासादरम्यान लक्झरी बसमध्ये ठेवलेल्या बॅगेतील सोन्या-चांदीचे दागिने असलेले दोन प्लास्टिकचे डबे अज्ञात चोरट्याने लंपास केल्याची घटना उघडकीस आली आहे.

मनोज हरीनारायण सोनी (वय 50 , रा. हैदराबाद) असे फिर्यादी सुवर्णकाराचे नाव आहे. पोलिसांनी दिलेल्या माहितीनुसार, सोनी यांना हैदराबाद येथील परिचित व्यक्तीने थेऊर फाटा येथील वृंदावन पॅलेस येथे आयोजित तृतीयपंथीय समाजाच्या राष्ट्रीय संमेलनात दागिन्यांची विक्री करण्याची संधी असल्याचे सांगितले होते. त्यानुसार त्यांनी नाकातील नोज पिन, कानातील दागिने तसेच विविध प्रकारचे सोन्या-चांदीचे दागिने तयार करून सोबत घेतले होते.
सोनी हे लक्झरी बसने हैदराबादहून लोणी काळभोरकडे 15 नोव्हेंबर रोजी रात्री सव्वाअकराच्या सुमारास निघाले. प्रवासादरम्यान बस दोन ठिकाणी चहा-नाश्त्यासाठी थांबली. त्यावेळी सोनी बसमधून खाली उतरले होते. मात्र, त्यांची बॅग बसमधील सीटवरच होती. 16 नोव्हेंबर रोजी सकाळी दहाच्या सुमारास ते थेऊर फाटा येथे उतरले. त्यानंतर एका हॉटेलमध्ये खोली घेऊन फ्रेश होताना बॅगेतील दागिन्यांचे दोन प्लास्टिकचे डबे गायब असल्याचे त्यांच्या निदर्शनास आले.

चोरीस गेलेल्या दागिन्यांमध्ये 1 लाख 98 हजार रुपये किमतीचे 15 ग्रॅम सोन्याचे दागिने, तर 40 हजार रुपये किमतीचे सुमारे 150 ते 200 ग्रॅम वजनाचे चांदीचे दागिने होते. यामध्ये नोज पिन, कानातील वेल, लटकन, नेकलेस, ब्रेसलेट, चैन, बाजूबंद आणि कानातील टॉप्स यांचा समावेश आहे. याप्रकरणी मनोज सोनी यांनी लोणी काळभोर पोलीस ठाण्यात अज्ञात चोरट्याविरोधात फिर्याद दिली आहे. त्यानुसार अज्ञात चोरट्याच्या विरोधात गुन्हा दाखल करण्यात आला आहे. लोणी काळभोर पोलिसांकडून पुढील तपास सुरू आहे.






