पुणे: धनकवडी येथील प्रसिद्ध सद्गुरू शंकर महाराज मठाच्या अन्नछत्राशी संबंधित गंभीर प्रकार उघडकीस आला आहे. अन्नछत्रासाठी अन्नपदार्थ तयार करणाऱ्या एका व्यावसायिकाकडून अन्न सुरक्षा नियमांचे उल्लंघन होत असल्याचे अन्न व औषध प्रशासनाच्या (FDA) तपासणीत समोर आले. आवश्यक परवान्याशिवाय आणि अस्वच्छ वातावरणात अन्न तयार केले जात असल्याने प्रशासनाने संबंधित व्यावसायिकाला व्यवसाय बंद ठेवण्याचे आदेश दिले आहेत. या कारवाईमुळे परिसरात चर्चेला उधाण आले आहे.

अन्न व औषध प्रशासनाच्या पथकाने सोमवारी धनकवडी परिसरातील संबंधित व्यावसायिकाच्या ठिकाणी अचानक तपासणी केली. सद्गुरू शंकर महाराज मठाच्या अन्नछत्रासाठी तसेच भाविकांना दिल्या जाणाऱ्या प्रसादासाठी येथे अन्नपदार्थ बनवले जात होते. मात्र, तपासणीदरम्यान अन्ननिर्मितीच्या ठिकाणी अनेक त्रुटी आढळून आल्या.
नियमानुसार अन्नपदार्थ तयार करण्यासाठी व्यावसायिकाकडे भारतीय अन्न सुरक्षा आणि मानक प्राधिकरणाचा (FSSAI) वैध परवाना किंवा नोंदणी असणे आवश्यक आहे. मात्र, संबंधित व्यावसायिकाकडे यापैकी कोणताही वैध दस्तऐवज नसल्याचे तपासणीत स्पष्ट झाले. त्याचबरोबर अन्न तयार करण्याची जागा अत्यंत अस्वच्छ असल्याचेही अधिकाऱ्यांच्या निदर्शनास आले. अशा परिस्थितीत तयार होणारे अन्न भाविकांच्या आरोग्यासाठी धोकादायक ठरू शकते, अशी बाब प्रशासनाने गांभीर्याने घेतली.

या प्रकाराची दखल घेत FDA ने संबंधित व्यावसायिकाला तातडीने व्यवसाय थांबवण्याचे निर्देश दिले आहेत. अन्ननिर्मितीच्या ठिकाणी आवश्यक स्वच्छता राखणे, सर्व नियमांचे पालन करणे आणि वैध परवाना किंवा नोंदणी मिळवणे बंधनकारक करण्यात आले आहे. या सर्व अटी पूर्ण केल्यानंतरच व्यवसाय पुन्हा सुरू करता येणार आहे.






