पुणे : विमानतळावरील खासगी विमान कंपनीत काम करणाऱ्या 35 वर्षीय वर्षा तुरकर हिच्या संशयास्पद मृत्यू प्रकरणात वर्षाच्या पतीने आणि आईने आता आर्थिक व्यवहारांबाबत मोठा खुलासा केला आहे. वर्षाने नागपूर येथील फ्लॅट विकून मिळालेल्या पैशांपैकी सुमारे 15 लाख रुपये निलेश अग्रवालला दिले होते, तर एकूण 60 लाख रुपये बिझनेसच्या विस्तारासाठी दिल्याचा दावा पतीने केला आहे. पैशांच्या देवाणघेवाणीवरून यांच्यात काही वाद झाला असावा, अशी शंका कुटंबीयांनी व्यक्त केली आहे.

मिळालेल्या माहितीनुसार, दिवाळीनिमित्त पुण्यावरून माहेरी आलेल्या वर्षाला तिचा मित्र निलेश अग्रवाल हा जंगलात घेऊन गेला होता. तिथे अज्ञात चोरट्यांनी पाठीत वार केल्यामुळे वर्षाचा मृत्यू झाला, असा बनाव निलेशने पोलिसांसमोर रचला होता. मात्र, त्याच्या विधानावर संशय आल्याने पोलिसांनी त्याला तातडीने ताब्यात घेऊन कसून चौकशी सुरू केली आहे.
दुसरीकडे, या प्रकरणात वर्षाच्या कुटुंबीयांनी केलेल्या दाव्यांमुळे खळबळ उडाली आहे. वर्षाच्या आईने निलेशवर गंभीर आरोप करताना सांगितले की, निलेशनेच फोन करून वर्षाला चाकू लागल्याची माहिती दिली आणि थोड्याच वेळात तिला हॉस्पिटलमध्ये नेल्याचे सांगितले. त्यामुळे संपूर्ण कट निलेशनेच रचून मुलीला संपवले असावा, असा संशय आईने व्यक्त केला आहे.

चार दिवसांपूर्वी गोंदिया जिल्ह्यातील बोंद्रानी परिसरातील निर्जन जंगलात तिचा मृतदेह आढळल्याने मोठी सनसनाटी निर्माण झाली होती. मृतदेहावर जखमांच्या खुणा असल्याने हा घातपात असल्याचा पोलिसांचा दाट संशय आहे. या घटनेचा पुढील तपास पोलीस करत आहेत.






