मुंबई: ठाणे जिल्ह्यातील दिवा परिसरात घडलेल्या घरफोडीच्या घटनेमुळे मंगळवारी सोशल मीडियावर एकच चर्चा सुरू झाली. अन्न व औषध प्रशासनाचे आयुक्त तुकाराम मुंढे यांच्या घरी दरोडा पडल्याची बातमी वेगाने पसरली. मात्र, या घटनेमागे नावातील साम्यामुळे निर्माण झालेला गैरसमज असल्याचे स्पष्ट झाले आहे. प्रत्यक्षात चोरीची घटना एका स्थानिक उद्योजकाच्या घरी घडली आहे.

दिवा शहरातील आगासनगाव परिसरात तुकाराम सत्यवान मुंडे यांचा आलिशान बंगला आहे. मंगळवारी पहाटेच्या सुमारास अज्ञात चोरट्यांनी या घराला लक्ष्य केले. घरात प्रवेश करून चोरट्यांनी सोन्याचे दागिने आणि रोख रक्कम चोरून नेली. चोरीला गेलेल्या वस्तूंमध्ये अडीच तोळे सोन्याचे दागिने आणि 80 हजार रुपयांच्या रोकडचा समावेश आहे.
या घटनेची माहिती समोर आल्यानंतर घरमालकाचे नाव आणि सनदी अधिकारी तुकाराम मुंढे यांचे नाव सारखे असल्याने मोठा संभ्रम निर्माण झाला. सोशल मीडियावर ‘तुकाराम मुंढे यांच्या घरी चोरी’ अशा आशयाच्या पोस्ट व्हायरल होऊ लागल्या. त्यामुळे अनेकांनी ही घटना थेट FDA आयुक्तांशी जोडली. मात्र, संबंधित बंगला हा स्थानिक उद्योजकाचा असल्याचे तपासातून स्पष्ट झाले.

दरम्यान, घटनेची माहिती मिळताच मुंब्रा पोलिसांनी घटनास्थळी धाव घेतली. पोलिसांनी घराची पाहणी करून पंचनामा केला असून या प्रकरणी गुन्हा दाखल करण्यात आला आहे. चोरीच्या घटनेचा तपास करताना पोलिसांनी एका संशयिताला ताब्यात घेतले आहे. चौकशी सुरू असून इतर आरोपींचा शोध घेण्याचे कामही सुरू आहे.






