पुणे: पुण्यातील बाणेर परिसरात एका तरुणाने चक्क सनदी अधिकारी असल्याचे भासवून नागरिकांची फसवणूक केल्याचा प्रकार उघडकीस आला आहे. केवळ बारावीपर्यंत शिक्षण घेतलेल्या 21 वर्षीय तरुणाने आपण IAS अधिकारी असल्याची खोटी माहिती पसरवली. एवढेच नाही, तर आपल्या बनावट ओळखीच्या जोरावर तो सोसायटीचा चेअरमनही बनला. या पदाचा गैरवापर करून त्याने आर्थिक गैरव्यवहार केल्याचा आरोप आहे. या प्रकरणी बाणेर पोलिसांनी त्याला अटक केली आहे.

हितेश प्रमोद कुलकर्णी असे अटक करण्यात आलेल्या तरुणाचे नाव आहे. तो बाणेर परिसरातील एका गृहनिर्माण सोसायटीत कुटुंबासह राहत होता. सोसायटीचे खजिनदार दत्तराय नागरगोजे यांनी त्याच्याविरोधात पोलिसांकडे तक्रार दाखल केली आहे.
पोलिसांनी दिलेल्या माहितीनुसार, जानेवारी ते नोव्हेंबर 2026 या कालावधीत हितेशने आपण IAS अधिकारी झाल्याचा बनाव केला. सोसायटीच्या व्हॉट्सअॅप ग्रुपवरही त्याने नियुक्ती झाल्याची खोटी माहिती दिली. त्याच्या बोलण्यावर आणि वागण्यावर विश्वास ठेवून सोसायटीच्या सदस्यांनी त्याची चेअरमनपदी निवड केली.

यानंतर त्याने पदाचा वापर करून नागरिकांना म्हाडाच्या लॉटरीतून सदनिका मिळवून देण्याचे आमिष दाखवले. सोसायटीतील 5 रिकाम्या सदनिका मिळवून देण्याच्या नावाखाली शुल्क आणि मुद्रांक शुल्काच्या कारणास्तव नागरिकांकडून तसेच सोसायटीच्या खात्यातून 19 लाख रुपये जमा केल्याचा आरोप आहे.
याशिवाय सोसायटीच्या 37 लाख रुपयांच्या मुदत ठेवीवर परस्पर 10 लाख रुपयांचे कर्ज घेतल्याचेही तपासात समोर आले आहे. या आर्थिक गैरव्यवहारामुळे एकूण 35 लाख रुपयांहून अधिक रकमेच्या अपहाराचा आरोप करण्यात आला आहे. प्रकरण उघडकीस आल्यानंतर पोलिसांनी हितेशला अटक केली असून, या फसवणुकीत आणखी कोणाचा सहभाग आहे का, याचा तपास सुरू आहे.






