पुणे :राष्ट्रवादी काँग्रेसचे अध्यक्ष आणि माजी केंद्रीय मंत्री शरद पवार यांची प्रकृती आता उत्तम असून त्यांना पुण्याच्या रुबी हॉल क्लिनिकमधून सुट्टी देण्यात आली आहे. गेल्या दोन दिवसांपासून त्यांच्यावर रुग्णालयात वैद्यकीय उपचार सुरू होते. रुग्णालयातून बाहेर पडल्यानंतर ते बारामतीला न जाता थेट मुंबईतील आपल्या ‘सिल्व्हर ओक’ या निवासस्थानी जाण्यासाठी निघाले आहेत.
दोन दिवसांपूर्वी शरद पवार यांना कफ आणि प्रचंड थकवा जाणवू लागल्यामुळे तातडीने रुग्णालयात भरती करण्यात आले होते. या अचानक उद्भवलेल्या अस्वास्थ्यामुळे त्यांचा नियोजित दुष्काळ पाहणी दौरा आणि इतर सर्व सार्वजनिक कार्यक्रम रद्द करावे लागले होते. डॉक्टरांनी त्यांच्या विविध वैद्यकीय चाचण्या केल्या आणि योग्य ते उपचार दिले. आता त्यांची प्रकृती पूर्णपणे स्थिर आणि सुधारलेली आहे.
रुग्णालयातून बाहेर पडताना शरद पवार हे व्हीलचेअरवर बसलेले दिसले. त्यांनी बाहेर उपस्थित असलेल्या आपल्या समर्थक व कार्यकर्त्यांना हात उंचावून अभिवादन केले. त्यांच्यासोबत पत्नी प्रतिभा पवार आणि खासदार सुप्रिया सुळे उपस्थित होत्या. मुंबईला निघण्यापूर्वी सुप्रिया सुळे यांनी रुग्णालयातील डॉक्टर आणि कर्मचाऱ्यांचे हात जोडून मनापासून आभार मानले.शरद पवार यांना रुग्णालयात दाखल केल्याचे समजताच पंतप्रधान नरेंद्र मोदी यांनी फोन करून त्यांच्या आरोग्याची विचारपूस केली होती.
वैद्यकीय तज्ज्ञांनी पवारांना पुढील काही दिवस पूर्ण विश्रांती घेण्याचा सल्ला दिला आहे. त्यानुसार ते मुंबईतील घरी सुमारे आठ दिवस आराम करतील. या विश्रांतीनंतर, म्हणजेच दिवाळीचा सण संपल्यावर, ते पुन्हा एकदा राज्यातील दुष्काळग्रस्त भागांची पाहणी करण्यासाठी दौरा सुरू करणार असल्याचे समजते.
