LPG eKYC Online Process 2026: छत्रपती संभाजीनगरसह राज्यातील अनेक ठिकाणी गॅस एजन्सींवर ई-केवायसीसाठी मोठ्या रांगा लागत असल्याचे चित्र पाहायला मिळत आहे. ग्राहकांना तासनतास थांबावे लागत असल्याने नाराजी व्यक्त होत होती. मात्र आता एलपीजी गॅस कनेक्शनची ई-केवायसी प्रक्रिया घरबसल्या मोबाईलवरून सहज पूर्ण करता येणार आहे.
अशी पूर्ण करा ईकेवायसी
केंद्र सरकारने फेस ऑथेंटिकेशन तंत्रज्ञान उपलब्ध करून दिले असून, याच्या मदतीने ग्राहकांना एजन्सीवर जाण्याची गरज उरणार नाही. ही प्रक्रिया पूर्ण करण्यासाठी सर्वप्रथम आपल्या गॅस कंपनीचे अधिकृत अॅप मोबाईलमध्ये डाउनलोड करणे आवश्यक आहे. भारत पेट्रोलियम, इंडेन किंवा एचपी गॅस यांचे अधिकृत अॅप प्ले स्टोअरवर उपलब्ध आहेत. त्यासोबत Aadhaar FaceRD हे अॅपही इन्स्टॉल करणे गरजेचे आहे.
अॅपमध्ये लॉगिन केल्यानंतर ई-केवायसी पर्याय निवडावा लागतो. त्यानंतर कंझ्युमर नंबर किंवा नोंदणीकृत मोबाईल नंबर टाकून ओटीपीद्वारे पडताळणी करावी लागते. माहिती तपासल्यानंतर फेस ऑथेंटिकेशनचा पर्याय निवडावा लागतो.
फेस स्कॅन करताना कॅमेऱ्यासमोर संबंधित व्यक्तीचा चेहरा नीट दिसेल याची काळजी घ्यावी. स्कॅनदरम्यान डोळ्यांची उघडझाप करावी लागते, ज्यामुळे सिस्टीमला खात्री होते की व्यक्ती प्रत्यक्ष उपस्थित आहे. प्रक्रिया पूर्ण झाल्यानंतर काही वेळातच eKYC Successful असा संदेश स्क्रीनवर दिसतो.
ही सुविधा सुरू झाल्यामुळे ग्राहकांचा वेळ वाचणार असून रांगेत उभे राहण्याची गरज कमी होणार आहे. प्रशासनाने नागरिकांना ही ऑनलाइन सुविधा वापरण्याचे आवाहन केले आहे. योग्य प्रकाशात आणि योग्य पद्धतीने फेस स्कॅन केल्यास ही प्रक्रिया सहज पूर्ण होते.
