Pune : पुणे महानगर परिवहन महामंडळाच्या (पीएमपी) बसमधून सापडलेली सुमारे 2.25 तोळे सोन्याचे दागिने आणि रोकड असलेली पर्स वाहक अभिमन्यू खंदारे यांनी संबंधित प्रवाशाला परत केल्याची घटना 3 एप्रिल रोजी घडली.
पहाटे 4.40 वाजता भेकराईनगर येथून वाघोलीकडे जाणारी पीएमपी बस रवाना झाली होती. हडपसर परिसरातून एक तरुणी तिच्या आई-वडिलांसह बसमध्ये चढली होती. वाघोली येथे बस पोहोचल्यानंतर सर्व प्रवासी उतरले. त्यानंतर बसची तपासणी करताना खंदारे यांना बसमध्ये एक पर्स आढळली.
पर्स तपासून पाहिल्यावर त्यामध्ये सुमारे 2.25 तोळे सोन्याचे दागिने आणि काही रोकड असल्याचे निदर्शनास आले. त्यांनी याची माहिती बस चालक संकेत गारुळे यांना दिली. चालकाने तत्काळ घोषणा करून संबंधित प्रवाशाचा शोध घेण्याचा प्रयत्न केला. दरम्यान, वाघोली येथे उतरलेले प्रवासी पुढे रांजणगावकडे जाणाऱ्या दुसऱ्या बसमध्ये बसल्याची माहिती मिळाली.
यानंतर खंदारे यांनी त्या बसमध्ये जाऊन प्रवाशांकडे चौकशी केली. एका तरुणीने पर्स ओळखून ती आपली असल्याचे सांगितले. वाघोली डेपोमध्ये अधिकाऱ्यांच्या उपस्थितीत पर्समधील साहित्याची पडताळणी करून ती संबंधित तरुणीकडे सुपूर्द करण्यात आली.
