लोणी काळभोर: पुणे दौंड लोहमार्गावर भरधाव चालेल्या रेल्वेने (Loni Kalbhor News) एका जेष्ठ नागरिकाला धडक दिल्याची घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील सेल पेट्रोल पंपाच्या पाठीमागील रुळावर रविवारी (ता.7) सकाळी साडेदहा वाजण्याच्या सुमारास घडली आहे. या अपघातात जेष्ठ नागरिकाचा जागीच मृत्यू झाला आहे.
बाळासाहेब भिकोबा महानवर (वय-72, रा. लोणी काळभोर, ता. हवेली) असे मृत्यू झालेल्या नागरिकाचे नाव आहे. बाळासाहेब महानवर हे थेऊर (ता. हवेली) येथील यशवंत सहकारी साखर कारखान्यात कामाला होते. सेवानिवृत्त झाल्यापासून ते कुटुंबासोबत घरीच असायचे. महानवर हे त्यांच्या मित्राला भेटण्यासाठी त्याच्या शेताकडे रविवारी सकाळी चालले होते.
दरम्यान, बाळासाहेब महानवर हे रेल्वे लाईन ओलांडताना, पुण्याकडून सोलापूरच्या दिशेने चाललेल्या अज्ञात रेल्वे गाडीने त्यांना जोरदार धडक दिली. या अपघातात महानवर हे जाग्यावरच निपचित पडले होते. नागरिकांनी या घटनेची माहिती लोणी काळभोर पोलिसांना दिली.
या घटनेची माहिती मिळताच, लोणी काळभोर पोलीस ठाण्याचे पोलीस हवालदार विलास शिंदे व त्यांचे सहकारी घटनास्थळी तत्काळ दाखल झाले. पोलिसांनी जखमी महानवर यांना रुग्णवाहिकेच्या माध्यमातून लोणी काळभोर परिसरातील एका बड्या हॉस्पिटलमध्ये उपचारासाठी दाखल केले. परंतु. बाळासाहेब महानवर यांचा उपचारापूर्वीच मृत्यू झाल्याचे येथील डॉक्टरांनी घोषित केले.
बाळासाहेब महानवर यांच्या निधनामुळे लोणी काळभोरसह परिसरात शोककळा पसरली आहे. त्यांच्या पार्थिवावर लोणी काळभोर येथील स्मशानभूमीत शोकाकुल वातावरणात अंत्यसंस्कार करण्यात आले. यावेळी सामाजिक, राजकीय व सहकार क्षेत्रातील पदाधिकाऱ्यांनी उपस्थिती लावली. महानवर यांच्या पश्चात दोन भाऊ, पत्नी, दोन मुलगे, मुलगी, सुना व नातवंडे असा परिवार आहे. येथील प्रगतशील शेतकरी सोमनाथ महानवर यांचे ते वडील होत.
