Hsc Result सासवड, ता. ३ : आयुष्यातील जबाबदाऱ्या, काळाचा मोठा खंड आणि प्रतिकूल परिस्थिती यांना न जुमानता शिक्षणाची ज्योत जिवंत ठेवणाऱ्या पुरंदर तालुक्यातील दोन महिलांनी जिद्द आणि चिकाटीच्या जोरावर बारावी परीक्षा उत्तीर्ण होत प्रेरणादायी यश संपादन केले आहे. बोपगाव येथील बायडाबाई चव्हाण (रेखा गोफणे) आणि पूजा वाडकर (पूजा फडतरे) यांनी अनुक्रमे २५ आणि १० वर्षांच्या शैक्षणिक खंडानंतर पुन्हा अभ्यासाला सुरुवात करून हे यश मिळवले आहे. Hsc Result
पुरंदर तालुक्यात प्रेरणादायी यशोगाथा
घरगुती जबाबदाऱ्या, आर्थिक अडचणी आणि वेळेअभावी शिक्षण अर्धवट राहिले होते. मात्र, “शिकायचंच” या निर्धाराने त्यांनी पुन्हा पुस्तके हाती घेतली. रेखा गोफणे या अंगणवाडी सेविका असून, त्यांनी तब्बल २५ वर्षांनंतर शिक्षणाचा धागा पकडत बारावी उत्तीर्ण होण्याचा पराक्रम केला. पूजा वाडकर यांनीही १० वर्षांच्या खंडानंतर शिक्षणात पुनरागमन करत उल्लेखनीय यश मिळवले. Hsc Result
या यशामागे ॲड. दत्तात्रय फडतरे यांचे महत्त्वपूर्ण मार्गदर्शन लाभले. त्यांनी दोघींना आवश्यक कागदपत्रांची पूर्तता, जुन्या शैक्षणिक नोंदी मिळवणे, डोमिसाईल गॅप सर्टिफिकेट तयार करणे, तसेच परीक्षा अर्ज भरण्यापर्यंत सर्व प्रक्रियेत हातभार लावला. त्यांच्या मार्गदर्शनामुळे अनेक अडचणींवर मात करणे शक्य झाले.
या यशामुळे संपूर्ण परिसरात आनंदाचे वातावरण असून, दोघींचे सर्व स्तरांतून कौतुक होत आहे. “शिक्षणाला वयाची मर्यादा नसते” आणि “जिद्द असेल तर कोणतीही अडचण आड येत नाही” हा संदेश या यशोगाथेतून अधोरेखित झाला आहे. त्यांच्या या कामगिरीमुळे अनेकांना नव्याने उभारी मिळणार असल्याचे मत व्यक्त होत आहे.
