पुणे : महाराष्ट्र शासनाच्या ‘मुख्यमंत्री माझी लाडकी बहीण योजने’च्या लाभार्थी महिलांचे लक्ष आता आगामी हप्त्याकडे लागले आहे. बँक खात्यात नियमित 1500 रुपये जमा होणार की जुलै आणि ऑगस्ट महिन्याचे मिळून एकत्रित 3000 रुपये मिळणार, यावरून चर्चा रंगली आहे.
मुख्यमंत्री माझी लाडकी बहीण योजनेअंतर्गत जून महिन्याचा हप्ता जुलैच्या मध्यवधीत महिलांच्या खात्यात वर्ग करण्यात आला होता. त्याच धर्तीवर जुलैचा हप्ता 15 ऑगस्टच्या आसपास मिळण्याचा अंदाज वर्तवला जात आहे. परंतु, जर हा हप्ता 17 ऑगस्टपर्यंत जमा झाला नाही, तर रक्षाबंधनाचे औचित्य साधून राज्य सरकार जुलै आणि ऑगस्ट या दोन्ही महिन्यांचे मिळून 3000 रुपये एकत्र देण्याची शक्यता नाकारता येत नाही.
दरम्यान या योजनेतील पारदर्शकता वाढवण्यासाठी सरकारने ई-केवायसी प्रक्रिया अनिवार्य केली होती. या पडताळणीनंतर सुमारे 80 लाख अर्जदारांचे अर्ज अपात्र ठरले आहेत. दुसरीकडे, 1 कोटी 66 लाख लाभार्थी महिला या योजनेसाठी पूर्णपणे पात्र ठरल्या असून, त्यांना लवकरच या निधीचा लाभ हस्तांतरित केला जाईल.
राज्य मंत्रिमंडळाच्या बैठकीत निधीचे वितरण आणि दुहेरी हप्त्याबाबत अधिकृत चर्चा होण्याची शक्यता व्यक्त केली जात आहे. प्रशासनाकडून अद्याप कोणतीही अंतिम घोषणा झालेली नसली, तरी रक्षाबंधनापूर्वी लाभार्थी महिलांना दिलासादायक बातमी मिळण्याची दाट शक्यता आहे.
