बीड: बीड जिल्ह्यातील सरपंच संतोष देशमुख यांच्या हत्या प्रकरणातील मास्टरमाइंड आरोपी वाल्मीक कराड याला व्हीआयपी ट्रीटमेंट देणं अधिकाऱ्यांना आता चांगलंच भोवलं आहे. याप्रकरणी वरिष्ठ तुरुंग अधिकारी डी.डी कवाळे आणि महिला शिपाई सीमा गोरे यांचे निलंबित करण्यात आले आहे.
बीड जिल्हा कारागृह गेल्या काही दिवसांपासून चर्चेत आहे. संतोष देशमुख हत्या प्रकरणातील आरोपी कराड कारागृहात आल्यापासून अनेक घटना समोर येत आहेत. त्याला व्हीआयपी ट्रीटमेंट देण्यात आल्याच्या आरोपानंतर कारागृह महासंचालक कार्यालयाच्या पथकाने अचानक तपासणी केली असता, रक्ताच्या नात्याव्यतिरिक्त इतर लोकांना आरोपीला भेटू दिल्याचे निदर्शनास आले. त्यानंतर अप्पर पोलीस महासंचालकांनी वरिष्ठ तुरुंग अधिकारी आणि महिला शिपाई या दोघांवर कारवाई केली. याआधीही वाल्मीक कराडला कारागृहात स्पेशल ट्रीटमेंट मिळत असल्याचे आरोप भाजप आमदार सुरेश धस राष्ट्रवादीचे आमदार संदीप क्षीरसागर आणि बजरंग सोनवणे यांनी वारंवार केले होते. त्यातच आता इतर लोकांशी होणाऱ्या भेटीमुळे कारागृह प्रशासन अडचणीत आले आहे.
दरम्यान वाल्मीक कराड याची तब्येत बिघडल्याने बीड जिल्हा रुग्णालयात सिटीस्कॅनसाठी नेण्यात आलं. दरम्यान त्यांच्या तब्येतीत सुधारणा होत आहे. त्यामुळे जिल्हा कारागृहातच त्याच्यावर उपचार केले जात आहेत.
