फुरसुंगी, ता. 25 : पहाटेच्या सुमारास चोरट्याने एटीएम मशीन फोडून रोकड लुटण्याचा प्रयत्न केल्याची घटना फुरसुंगी गावात घडली. चोरट्याने छिन्नी आणि हातोड्याच्या सहाय्याने एटीएम मशीनची तोडफोड केली. मात्र, रोकड लुटण्यात त्याला यश आले नाही. या घटनेत एटीएम मशीनचे सुमारे 55 हजार रुपयांचे नुकसान झाले आहे. ही घटना शुक्रवारी (ता. 25) पहाटे सुमारे 3.10 वाजता घडली. याप्रकरणी एटीएम देखभाल करणाऱ्या कंपनीच्या एरिया मॅनेजरने फुरसुंगी पोलिसांकडे तक्रार दिली आहे.
पोलिसांनी दिलेल्या माहितीनुसार, हर्षद सुरेंद्र सुतार (वय 38, रा. उरुळी देवाची) हे एटीएम देखभाल व दुरुस्तीचे काम करणाऱ्या कंपनीत एरिया मॅनेजर म्हणून कार्यरत आहेत. त्यांच्या नियंत्रणाखाली हडपसर, खराडी, वाघोली, वडगावशेरी परिसरातील एचडीएफसी बँकेच्या एटीएमची देखभाल केली जाते. शुक्रवारी पहाटे 3.48 वाजता कंपनीच्या कमांड सेंटरमधून सुतार यांना फोन आला. फुरसुंगी गावातील एचडीएफसी बँकेच्या एटीएममध्ये एका अनोळखी व्यक्तीने तोडफोड करून चोरी करण्याचा प्रयत्न केल्याची माहिती त्यांना देण्यात आली.
यानंतर सुतार यांनी सकाळी सुमारे 9 वाजता घटनास्थळी जाऊन पाहणी केली. त्यावेळी एटीएम मशीनचा कॉस्मेटिक दरवाजा, प्रेझेंटर, शटर असेंब्ली, एस अँड जी लॉक आदींची तोडफोड झाल्याचे निदर्शनास आले. तोडफोडीत एटीएमच्या विविध भागांचे नुकसान झाले असून त्याची अंदाजे किंमत पुढीलप्रमाणे आहे. प्रेझेंटर – 35 हजार रुपये,शटर असेंब्ली – 15 हजार रुपये, कॉस्मेटिक दरवाजा – 5 हजार रुपये
अशा प्रकारे एकूण 55 हजार रुपयांचे नुकसान झाले आहे.
मास्कधारी चोरटा सीसीटीव्हीत कैद
दरम्यान, कंपनीच्या कमांड सेंटरकडून मिळविण्यात आलेल्या व्हिडीओ फुटेजमध्ये एक व्यक्ती छिन्नी आणि हातोड्याच्या साहाय्याने एटीएम फोडण्याचा प्रयत्न करताना दिसून आली आहे. सीसीटीव्हीतील वर्णनानुसार, संबंधित व्यक्तीने काळ्या रंगाचा मास्क, पांढरा शर्ट आणि काळी पॅन्ट परिधान केली होती. त्याच्या एका हातात केसरी रंगाचे हॅन्डग्लोज होते. त्याचे वय अंदाजे 25 ते 30 वर्षे असून उंची सुमारे पाच फूट सहा इंच आणि बांधा मध्यम असल्याचे तक्रारीत नमूद करण्यात आले आहे. एटीएम फोडून रोकड लुटण्याचा प्रयत्न करणाऱ्या या अज्ञात व्यक्तीविरोधात कायदेशीर तक्रार दाखल करण्यात आली असून, सीसीटीव्ही फुटेजच्या आधारे पोलिसांकडून चोरट्याचा शोध सुरू आहे.
