पुणे: गुप्तांगाच्या भागात (Fungal Infection) खाज येणे ही समस्या अनेकदा महिला आणि पुरुष दोघांनाही जाणवते. ही समस्या तशी सामान्य असली तरी, वारंवार होणारी खाज त्रासदायक ठरते आणि काहीवेळा ती कोणत्यातरी संसर्गाचे किंवा त्वचेच्या विकाराचे लक्षण असू शकते. त्यामुळे या खाजेची कारणे आणि त्यावर करायचे उपाय समजून घेणे आवश्यक आहे.
गुप्तांगामध्ये खाज येण्यामागे अनेक कारणे असू शकतात. बुरशीजन्य संसर्ग हे खाज येण्याचे मुख्य कारण आहे. दमट हवामान, घाम आणि स्वच्छता न राखल्यास ‘यीस्ट इन्फेक्शन’ किंवा ‘जॉक इच’ सारखे संसर्ग होतात. याशिवाय महिलांमध्ये ‘बॅक्टेरियल व्हेजिनोसिस’सारखे जिवाणू संसर्ग देखील खाजेसाठी कारणीभूत ठरतात. यामागे लॅटेक्स असलेल्या साबण, डिटर्जंट किंवा कॉन्डोममुळे होणारी ॲलर्जी हे एक महत्त्वाचे कारण आहे. तसेच, काही वेळा सोरायसिस किंवा एक्झिमा यांसारखे त्वचेचे जुने विकार देखील या भागात खाज निर्माण करतात. खाजेसोबत काही विशिष्ट लक्षणे दिसल्यास डॉक्टरांचा सल्ला घेणे आवश्यक ठरते.
खाज कमी करण्यासाठी साधे घरगुती उपाय
नेहमी सुती आणि सैल अंतर्वस्त्रे वापरा. घट्ट कपडे घालणे टाळा, कारण त्यामुळे दमटपणा वाढतो. गुप्तांगाचा भाग नेहमी कोरडा आणि स्वच्छ ठेवा. आंघोळीनंतर तो भाग पुसून घ्या. परफ्यूम असलेले साबण, बॉडी वॉश आणि स्प्रे वापरणे टाळावे. जास्त साखर खाल्ल्याने यीस्ट संसर्गाची वाढ होऊ शकते, त्यामुळे आहारात साखरेचे प्रमाण कमी करा. जर ही समस्या 2 ते 3 दिवसांत कमी झाली नाही, तर त्वचारोग तज्ज्ञ किंवा स्त्रीरोग तज्ज्ञांचा सल्ला घेणे महत्त्वाचे आहे.
