जामखेड, (अहमदनगर) : जामखेड -खर्डा रस्त्यावर बटेवाडी शिवारात एसटी बस आणि कारचा भीषण अपघात झाल्याची घटना घडली आहे. ही घटना रात्री साडेबारा वाजण्याच्या सुमारास बटेवाडी शिवारात पेट्रोलपंपाजवळ घडली. या भीषण अपघातात दोघांचा मृत्यू झाला असून तीन जण गंभीर जखमी झाले आहेत. अपघातातील जखमीवर नगर येथील जिल्हा रुग्णालयात उपचार सुरू आहेत.
आपघातील पाचहीजण नगर तालुक्यातील वडगाव गुप्ता या गावचे रहिवासी आहेत. विजय गंगाधर गव्हाणे (वय-24), पंकज सुरेश तांबे (वय-24) अशी अपघातात मृत्यू झालेल्या दोघांची नावे आहेत. तर, मयुर संतोष कोळी (वय-18), सचिन दिलिप गीते (वय-30) व अमोल बबन डोंगरे (वय-28, तिघे रा. राहणार वडगाव गुप्ता, ता. नगर) हे तीन जण गंभीर जखमी झाले आहेत.
याबाबत अधिक माहिती अशी की, कोपरगाव डेपोची शिर्डी-हैदराबाद ही बस हैदराबादकडे जात होती. त्याचवेळी अक्कलकोट व तुळजापूर येथून देवदर्शन करुन पाच तरुण चारचाकी गाडीने नगर तालुक्यातील वडगाव गुप्ता या गावी जात होते. सोमवारी मध्यरात्री साडे बारा वाजण्याच्या सुमारास एसटी बस व चारचाकी वहानाची जामखेड-खर्डा रोडवरील पेट्रोलपंपाजवळ जोरदार धडक झाली.
यानंतर आपघातील पाच जखमींना तातडीने जामखेड येथील खासगी रुग्णालयात दाखल केले होते. मात्र, त्यांची प्रकृती चिंताजनक असल्याने त्यांना तातडीने पुढील उपचारासाठी नगर येथे हलवण्यात आले होते. मात्र, रस्त्यातच विजय गव्हाणे व पंकज तांबे या दोघांचा मृत्यू झाला. तर अन्य जखमींवर खाजगी रुग्णालयात उपचार सुरू आहेत.
