कोरेगाव भीमा, (पुणे) : कोरेगाव भीमा येथील विजयस्तंभाला मानवंदना देण्यासाठी येणाऱ्या नागरिकांसाठी पुणे महानगर परिवहन महामंडळाकडून (पीएमपी) ३१ डिसेंबर व एक जानेवारी २०२३ रोजी जादा बस सोडण्याचे नियोजन करण्यात आले आहे.
त्यापैकी वाहनतळ व अंतर्गत भागात फिरण्यासाठी ८० बस विनातिकीट व शहरातील आठ स्थानकांवरून तिकीट असलेल्या ९० बस सोडल्या जाणार आहेत.
कोरेगाव भीमा येथे अंतर्गत भागात फिरण्यासाठी मोफत ८० बसचे पीएमपीकडून नियोजन केले आहे. ३१ डिसेंबर २०२२ रोजी सायंकाळी नऊ ते एक जानेवारी २०२३ रोजी सकाळी सहा वाजेपर्यंत तुळापूर फाटा, लोणीकंद कुस्ती मैदान येथून ४० बस सोडण्यात येतील.
वढू फाटा ते वढूसाठी पाच बस व तोरणा हॉटेल, शिक्रापूर रोड ते कोरेगाव भीमापर्यंत ३५ अशा एकूण ८० बस मोफत सोडण्याचे नियोजन करण्यात आले आहे.पुणे व पिंपरीतून ९० बस पुणे व पिंपरी-चिंचवड शहरातील विविध स्थानकांवरून प्रवास भाडे आकारणी करून जादा बसचे नियोजनदेखील करण्यात आले आहे.
त्यात पुणे स्टेशनवरून ३८, मनपा येथून ३५, दापोडी मंत्री निकेतन २, ढोलेपाटील रोड मनपा शाळा २, अप्पर डेपो बस स्थानक ४, पिंपरी आंबेडकर चौक ३, भोसरी स्थानक ४, हडपसर स्थानक २ अशा बस सोडण्यात येणार आहेत.
यामध्ये नियमित बस ५५ असून, अतिरिक्त बस ३५ सोडण्यात आल्या आहेत, अशी माहिती पीएमपीकडून देण्यात आली.
