England vs India : भारत आणि इंग्लंड यांच्यातील पाच सामन्यांच्या मालिकेतील पहिल्या कसोटी सामन्यात इंग्लंडने टीम इंडियाचा ५ विकेट्सने पराभव केला. इंग्लंडने चौथ्या डावात ३७१ धावा करून इतिहास रचला. यावेळी बेन डकेटने शानदार शतक करत इंग्लडला विजय मिळवून दिला.
या ऐतिहासिक विजयासह इंग्लंडने मालिकेत १-० अशी आघाडी घेतली आहे. इंग्लंडकडून बेन डकेटने शानदार खेळ दाखवला. त्याने चौथ्या डावात १७० चेंडूंचा सामना करत १४९ धावा केल्या. तर जॅक क्रॉलीने ६५ धावा केल्या. डकेट आणि क्रॉलीने पहिल्या विकेटसाठी १८८ धावांची सामनावीर भागीदारी केली. त्यांच्या या भागीदारीने इंग्लडला सहज जिंकवून दिले.
दरम्यान, लीड्स कसोटीतील पराभवानंतर दिनेश कार्तिकचा एक व्हिडिओ सोशल मीडियावर व्हायरल होत आहे. दिनेशने भारतीय संघाची तुलना कुत्र्याशी केल्याचा हा व्हिडिओ आहे. टीम इंडियाच्या पराभवानंतर हा व्हिडिओ जोरदार व्हायरल होत आहे.
व्हायरल झालेल्या व्हिडिओमध्ये दिनेश कार्तिक म्हणताना दिसत आहे की, “मी सोशल मीडियावर एक मीम पाहिला, ज्यामध्ये टीम इंडियाच्या फलंदाजीची तुलना डॉबरमॅन कुत्र्याशी करण्यात आली होती. कारण त्या कुत्र्याचे डोके ठीक आहे, मधला भागही ठीक आहे, पण शेपूट नाही.” यानंतर सगळे हसायला लागतात.
लीड्समधील पराभवानंतर, टीम इंडियाला २०२५-२७ च्या जागतिक क्रिकेट स्पर्धेच्या दृष्टीने मोठा धक्का बसला आहे. २०२५-२७ च्या जागतिक क्रिकेट स्पर्धेच्या दृष्टीने ही मालिका खूप महत्त्वाची आहे. मात्र, टीम इंडियाने पराभवाने सुरुवात केल्याने पॉइंट टेबलमध्ये याचे परिणाम दिसून येतील.
