पुणे : केंद्र सरकारच्या 54 महत्त्वाच्या अधिकृत संकेतस्थळांवर ‘DDoS’ (डिस्ट्रिब्युटेड डिनायल ऑफ सर्व्हिस) सायबर हल्ला करण्याचा प्रयत्न ‘ऑपरेशन सिंदूर’च्या काळात झाला होता. या अत्यंत गंभीर प्रकरणाचा तपास सध्या राष्ट्रीय तपास यंत्रणा करत आहे. या तपासाचे धागेधोरे आता पुणे जिल्ह्यातील जुन्नरपर्यंत पोहोचले आहेत.
24 ऑगस्ट रोजी NIA ने देशातील 5 वेगवेगळ्या ठिकाणी धाडी टाकून मोठी शोधमोहीम राबवली. या कारवाईचा एक भाग म्हणून जुन्नरमधील तांदूळ बाजार भागात राहणाऱ्या 2 स्थानिक नागरिकांना तपास यंत्रणेने ताब्यात घेतले आहे. संशयास्पद पैशांचे व्यवहार झाल्याच्या संशयावरून त्यांची कसून चौकशी केली जात आहे. दरम्यान, या कारवाईबाबत जुन्नर पोलीस ठाण्यात सध्या कोणत्याही प्रकारचा गुन्हा नोंदवण्यात आलेला नाही, असे स्थानिक पोलिसांनी स्पष्ट केले आहे.
या संपूर्ण मोहिमेदरम्यान NIA ने 3 लॅपटॉप, 5 मोबाईल फोन आणि इतर डिजिटल पुरावे जप्त केले आहेत. मात्र, यापैकी कोणते साहित्य थेट जुन्नरमधून जप्त करण्यात आले, याविषयी अद्याप कोणतीही अधिकृत माहिती समोर आलेली नाही.
आता ताब्यात घेतलेल्या या दोन व्यक्तींचा या सायबर हल्ल्याशी थेट काय संबंध आहे आणि त्यांनी केलेले आर्थिक व्यवहार नेमके कोणाशी जोडलेले आहेत, याचा उलगडा NIA च्या पुढील तपासातच होणार आहे.
