लोणी काळभोर : ऑनलाइन गुंतवणूक, पार्ट-टाईम जॉब, डिजिटल अटक यांसारख्या आमिषांद्वारे नागरिकांची फसवणूक करणाऱ्या सायबर गुन्हेगारांच्या टोळीशी संबंधित ‘म्युल बँक अकाउंट’चा लोणी काळभोर पोलिसांच्या सायबर विभागाने पर्दाफाश केला आहे. या प्रकरणात संबंधित खातेदारासह त्याच्या साथीदारांविरोधात गुन्हा दाखल करण्यात आला असून, फसवणुकीत वापरलेल्या बँक खात्यातून 59 हजार 500 रुपयांचे संशयास्पद व्यवहार झाल्याचे तपासात निष्पन्न झाले आहे.
पोलिसांनी दिलेल्या माहितीनुसार, देशभरात वाढणाऱ्या सायबर फसवणुकीच्या पार्श्वभूमीवर राष्ट्रीय सायबर गुन्हे नोंदणी पोर्टल (NCRP) व गृह मंत्रालयाच्या पोर्टलवरील माहितीचे विश्लेषण करण्यात आले. त्यामध्ये पुणे शहरातील एका Axis Bank खात्यात सायबर फसवणुकीची रक्कम जमा झाल्यानंतर ती विविध खात्यांमध्ये हस्तांतरित करण्यात आल्याचे समोर आले.
तपासात संबंधित खाते ‘Nirnkar Interior Pro-Jacky’ या नावाने उघडण्यात आल्याचे आढळले. हे खाते लोणी काळभोर परिसरातील व्यक्तीच्या नावावर असल्याचे निष्पन्न झाले. या खात्यात फसवणुकीची रक्कम जमा करून ती पुढे इतर खात्यांमध्ये वळविण्यात येत असल्याचे ‘मनी ट्रेल’च्या विश्लेषणातून स्पष्ट झाले.
सायबर तपासादरम्यान संबंधित खात्याविरोधात NCRP पोर्टलवर तक्रारी नोंद झालेल्या असल्याचेही उघड झाले. उपलब्ध माहितीनुसार, या खात्याच्या माध्यमातून 59 हजार 500 रुपयांची ऑनलाइन फसवणूक झाल्याचे निष्पन्न झाले असून, ही रक्कम सायबर गुन्हेगारांच्या आर्थिक साखळीत फिरविण्यात आल्याचा संशय आहे.
लोणी काळभोर पोलिसांच्या सायबर विभागाने खातेदाराने संघटित सायबर गुन्हेगारी टोळीला आपल्या बँक खात्याचा वापर करण्यास परवानगी दिल्याचा ठपका ठेवत त्याच्यासह इतर साथीदारांविरोधात सरकारतर्फे कायदेशीर तक्रार दाखल केली आहे. या प्रकरणाचा पुढील तपास सुरू असून, या रॅकेटशी संबंधित इतर संशयितांचा शोधही पोलिसांकडून घेतला जात आहे.
