पुणे: पुण्यातील शिवाजीनगर परिसरातील वाढत्या वाहतूक कोंडीवर कायमस्वरूपी उपाय करण्यासाठी पुणे महानगरपालिकेने महत्त्वाचा निर्णय घेतला आहे. या अंतर्गत ७३.५२ कोटी रुपये खर्चून नवीन उड्डाणपूल आणि ग्रेड सेपरेटर उभारण्यात येणार असून, या प्रकल्पाला महापालिकेच्या स्थायी समितीची मंजुरी मिळाली आहे. हा प्रकल्प पूर्ण झाल्यानंतर मध्यवर्ती पुण्यातील अनेक प्रमुख रस्त्यांवरील वाहतूक कोंडी मोठ्या प्रमाणात कमी होण्याची अपेक्षा आहे.
या प्रकल्पांतर्गत साखर संकुल ते जुना पुणे–मुंबई महामार्ग असा उड्डाणपूल उभारण्यात येणार आहे. त्यासोबतच वाहतुकीचा प्रवाह अधिक सुरळीत करण्यासाठी ग्रेड सेपरेटरही बांधला जाणार आहे. महापालिकेने हा प्रकल्प पुढील १८ महिन्यांत पूर्ण करण्याचे उद्दिष्ट निश्चित केले आहे.
सध्या कृषी महाविद्यालय, शिवाजीनगर, शिमला ऑफिस चौक, संचेती रुग्णालयाजवळील जंक्शन आणि कॉलेज ऑफ इंजिनिअरिंग पुणे (सीओईपी) परिसरात दररोज सकाळ-संध्याकाळ मोठ्या प्रमाणात वाहतूक कोंडी होते. या कोंडीचा परिणाम आजूबाजूच्या रस्त्यांवरही होत असल्याने संपूर्ण मध्यवर्ती शहरातील वाहतुकीचा वेग मंदावतो. या समस्येचा सखोल अभ्यास केल्यानंतर महापालिकेच्या विशेष प्रकल्प विभागाने उड्डाणपूल आणि ग्रेड सेपरेटर उभारण्याचा प्रस्ताव तयार केला.
हा प्रकल्प पूर्ण झाल्यानंतर वाहनचालकांना अनेक गर्दीच्या चौकांना वळसा घालून थेट इच्छित मार्गावर जाता येईल. त्यामुळे प्रमुख चौकांवरील वाहनांची गर्दी कमी होण्यास मदत होईल. तसेच जुना पुणे–मुंबई महामार्ग आणि गणेशखिंड रस्त्यादरम्यानची संपर्क व्यवस्था अधिक सक्षम होणार आहे.
प्रकल्पासाठी प्रितम एंटरप्राइझ या संस्थेची सल्लागार म्हणून १४ ऑगस्ट २०२५ रोजी नियुक्ती करण्यात आली होती. स्थलाकृतिक आणि भूतांत्रिक सर्वेक्षण तसेच वाहतुकीचा अभ्यास पूर्ण केल्यानंतर सल्लागाराने उड्डाणपुलाचा आराखडा, सविस्तर प्रकल्प अहवाल, अंदाजपत्रक आणि तांत्रिक कागदपत्रे महापालिकेकडे सादर केली. या प्रकल्पाला २० नोव्हेंबर २०२५ रोजी तांत्रिक मंजुरी मिळाली, तर १९ जानेवारी २०२६ रोजी महापालिका आयुक्तांनी निविदा प्रक्रिया सुरू करण्यास हिरवा कंदील दिला.
महापालिकेच्या २०२५-२६ च्या अर्थसंकल्पात या प्रकल्पासाठी केवळ २.६ कोटी रुपयांची प्राथमिक तरतूद करण्यात आली आहे. या निधीतून प्रारंभिक कामे हाती घेतली जाणार असून, उर्वरित निधी पुढील आर्थिक वर्षांच्या अर्थसंकल्पातून टप्प्याटप्प्याने उपलब्ध करून दिला जाणार आहे. बांधकामाच्या काळात विद्यमान वाहतुकीवर कमीत कमी परिणाम होईल, यासाठी विशेष नियोजन करण्यात येणार असून वाहनचालकांना अडचण होऊ नये यासाठी आवश्यक उपाययोजनाही राबविण्यात येणार आहेत.
