Crime : अहिल्यानगर जिल्ह्यातील पारनेर तालुक्यात संसारातील वादातून थेट खुनापर्यंत गेलेली धक्कादायक घटना उघडकीस आली आहे. ढवळपुरी शिवारातील डोंगरात सापडलेल्या मृतदेहाचे गूढ अवघ्या 72 तासांत उलगडत पोलिसांनी मृताच्या जावयासह त्याच्या साथीदाराला अटक केली.
22 फेब्रुवारी 2026 रोजी दुपारी 3 वाजण्यापूर्वी ढवळपुरी (ता. पारनेर) परिसरात रामदास निवृत्ती सोनवणे (वय 55, रा. निमगाव सावा, ता. जुन्नर, जि. पुणे) यांचा गळा आवळून खून करून मृतदेह डोंगरात टाकल्याचे समोर आले. 25 फेब्रुवारी रोजी तुळशीराम सोनवणे (रा. सुलतानपूर, ता. जुन्नर) यांनी दिलेल्या फिर्यादीवरून Parner Police Station येथे खुनाचा गुन्हा दाखल झाला.
प्रकरणाचे गांभीर्य लक्षात घेऊन जिल्हा पोलीस अधीक्षक सोमनाथ घार्गे यांनी स्थानिक गुन्हे शाखेला तपासाचे आदेश दिले. पोलीस निरीक्षक किरणकुमार कबाडी यांच्या नेतृत्वाखाली विशेष पथक तयार करण्यात आले. घटनास्थळाची पाहणी, कॉल डिटेल्स, तांत्रिक पुरावे आणि गुप्त माहितीच्या आधारे संशय मृताच्या जावयावर गेला.
तपासात उघड झाले की अमित नारायण डुकरे (वय 34, रा. पारगाव तर्फे आळे, ता. जुन्नर) आणि त्याचा मित्र अमोल उत्तम डुकरे (वय 31, रा. औरंगपूर, ता. जुन्नर) यांनी मिळून कट रचला. 25 फेब्रुवारी रोजी दोघांना ताब्यात घेऊन चौकशी केली असता त्यांनी गुन्ह्याची कबुली दिली.
अमितची पत्नी गेल्या वर्षभरापासून माहेरी राहत होती. त्यांना सव्वा वर्षांची मुलगी आहे. चौकशीत अमितने सांगितले की सासरे वारंवार वाद घालत होते आणि मुलीला ठार मारण्याची धमकी देत होते. संतापाच्या भरात त्याने सासऱ्याला कारमध्ये बसवून नेले आणि गळा आवळून खून केला. त्यानंतर मृतदेह डोंगरात फेकून दिला.
दोन्ही आरोपींना न्यायालयात हजर करण्यात आले असून पुढील तपास सुरू आहे. कौटुंबिक वाद किती टोकाला जाऊ शकतो, याचे हे भयावह उदाहरण ठरले आहे.
