Pune : पुणे आणि नाशिक जिल्ह्यांत बिबट्याचा वाढता वावर चिंतेचा विषय ठरत असतानाच, पुणे जिल्ह्यातील मंचर परिसरात पुन्हा एकदा बिबट्याची धाडसी एन्ट्री सीसीटीव्हीत कैद झाली आहे. आंबेगाव तालुक्यातील मेंगडेवाडी येथे 25 फेब्रुवारी रोजी पहाटे 3.22 वाजता बिबट्याने पाळीव कुत्र्यावर झडप घालून त्याची शिकार केली.
ही घटना मेंगडेवाडीचे माजी सरपंच भरत फल्ले यांच्या घरासमोर घडली. घराबाहेर तीन पाळीव कुत्री होती. त्यापैकी एकाला बिबट्याच्या येण्याची चाहूल लागताच तो पळून गेला. मात्र दुसरे कुत्रे गाढ झोपेत असल्याने त्याला बचावाची संधीच मिळाली नाही. बिबट्याने दबक्या पावलांनी येत क्षणात त्याच्या मानेवर पकड घेतली आणि त्याला ओढत नेले. तिसरे कुत्रे घरात बांधलेले असल्याने दूरून भुंकत राहिले.
पुणे जिल्ह्यातील Pune आणि Nashik परिसरात गेल्या काही महिन्यांत बिबट्यांच्या हल्ल्यांच्या घटना वाढल्या आहेत. मध्यंतरी लोकवस्तीत घुसून लहान मुलांवर हल्ल्याच्या घटना समोर आल्या होत्या. वाढती शेती, उसाचे क्षेत्र, पाणवठे आणि मानवी वसाहतींचा विस्तार यामुळे बिबट्यांचा अधिवास मानवी वस्तीजवळ सरकत असल्याचे वनतज्ज्ञ सांगतात.
मेंगडेवाडीतील घटनेनंतर ग्रामस्थांमध्ये भीतीचे वातावरण आहे. विशेषतः पहाटे आणि रात्रीच्या वेळी नागरिकांनी सतर्क राहण्याचे आवाहन करण्यात येत आहे. वनविभागाने तातडीने पिंजरा लावून बिबट्याला जेरबंद करावे, अशी मागणी ग्रामस्थांनी केली आहे.
वनखात्याने परिसराची पाहणी करून पाऊलखुणा तपासण्यास सुरुवात केली आहे. सीसीटीव्ही फुटेजच्या आधारे बिबट्याची हालचाल निश्चित करण्याचे प्रयत्न सुरू आहेत. दरम्यान, नागरिकांनी एकटे बाहेर न पडणे, लहान मुलांवर लक्ष ठेवणे आणि पाळीव प्राण्यांना सुरक्षित ठिकाणी बांधणे, अशा सूचना देण्यात आल्या आहेत.
