पुणे : काश्मीरच्या पहलगाममधील दहशतवादी हल्ल्यानंतर भारतीय सैन्याकडून ऑपरेशन सिंदूर राबवत पाकिस्तान आणि पाकव्यक्त काश्मीरमधील दहशतवादी तळ उध्वस्त करण्यात आली होती. या ऑपरेशन सिंदूरनंतर पुण्यातील कोंढवा परिसरात राहणाऱ्या एका 19 वर्षीय तरुणीने पाकिस्तानचे समर्थन करणारी वादग्रस्त पोस्ट शेअर केल्यामुळे तिला अटक झाली होती. खतीजा शहाबुद्दीन शेख असं तिचं नाव आहे. ती येरवडा तुरुंगात आहे. या तरुणीला तात्काळ सोडण्याचे आदेश मुंबई हायकोर्टाने तुरुंग प्रशासनाला दिले आहेत.
सोशल मीडियावर वादग्रस्त पोस्ट केल्याप्रकरणी 19 वर्षीय तरुणीला काही दिवसांपूर्वी अटक करण्यात आली होती. तसंच तिला कॉलेजमधूनही काढून टाकण्यात आलं होतं. सदर तरुणीने हायकोर्टात धाव घेतल्यानंतर आज कोर्टाने तिला दिलासा देत तिच्या सुटकेबाबतचे आदेश दिले आहेत. तसंच गुन्हा दाखल होऊन अटक झाल्याने कॉलेजमधून काढून टाकण्याच्या कॉलेजच्या कृतीवर हायकोर्टाने तीव्र नाराजीही व्यक्त केली आहे. त्याचबरोबर पुन्हा सोशल मीडियावर बेजबाबदारपणे व्यक्त होणार नाही आणि इतरांच्या बेजाबदार पोस्ट शेअर करणार नाही, अशी हमी देण्यास कोर्टाने विद्यार्थिनीला सांगितले आहे.
तसेच तिला परीक्षेतील उर्वरित विषयांची परीक्षा देण्यास परवानगी देण्यात आली आहे. आधी ज्या विषयांची परीक्षा हुकली, त्याविषयी विद्यापीठाला विनंती करण्याची मुभाही कोर्टाकडून देण्यात आली आहे. त्यामुळे तरुणीला मोठा दिलासा मिळाला आहे.
