यवत, ता. ४ : केडगाव (२२ फाटा, ता. दौंड) परिसरात शेतात चारा आणण्यासाठी निघालेल्या दांपत्याला अडवून तिघा अज्ञातांनी बेदम मारहाण करत महिलेच्या गळ्यातील मंगळसूत्र, कानातील दागिने आणि पतीचा मोबाईल असा सुमारे ८० हजार रुपयांचा ऐवज लुटल्याची धक्कादायक घटना घडली आहे. विशेष म्हणजे, याच रात्री परिसरातून एका नागरिकाची दुचाकीही चोरीला गेल्याने या प्रकारामुळे परिसरात भीतीचे वातावरण निर्माण झाले आहे.
पोलिसांनी दिलेल्या माहितीनुसार, जावेद अल्लीभाई शेख (वय ३७) हे पत्नी तब्बसुम आणि कुटुंबासह केडगाव (२२ फाटा) येथे वास्तव्यास असून शेती व्यवसाय करतात. २९ जून रोजी रात्री सुमारे ८ वाजण्याच्या सुमारास ते पत्नीसह शेतातून गुरांसाठी चारा आणण्यासाठी जात होते. यावेळी शेताजवळून पायी येणाऱ्या तिघा अनोळखी इसमांनी त्यांना अडवून चौकशी केली. काही क्षणातच एका आरोपीने जावेद शेख यांच्या खिशातील मोबाईल हिसकावला. त्यांनी विरोध करत मोबाईल परत मागितल्यावर तिघांनी त्यांना शिवीगाळ करत लाथाबुक्क्यांनी मारहाण केली.
पतीला वाचवण्यासाठी पत्नी तब्बसुम मध्ये पडताच आरोपींनी त्यांना जोरात ढकलून खाली पाडले. त्यानंतर त्यांच्या गळ्यातील मनी मंगळसूत्र आणि दोन्ही कानातील बुगड्या जबरदस्तीने काढून घेतल्या. दांपत्याने आरडाओरडा केल्यानंतर आरोपी खुटबावच्या दिशेने पळून गेले. या घटनेत सुमारे ४० हजारांचे मंगळसूत्र, ३० हजारांच्या सोन्याच्या बुगड्या आणि १० हजारांचा रेडमी मोबाईल, असा एकूण ८० हजार रुपयांचा ऐवज लंपास करण्यात आला.
दरम्यान, याच रात्री केडगाव येथील तुषार हरिभाऊ मोरे यांच्या घरासमोर उभी असलेली हिरो एचएफ डिलक्स (एमएच-४२ बीक्यू-९१४७) ही दुचाकीही चोरीला गेल्याची माहिती समोर आली आहे. या दोन्ही घटनांचा परस्पर संबंध आहे का, याचाही तपास पोलीस करत आहेत. या प्रकरणी यवत पोलीस ठाण्यात तिघा अज्ञात आरोपींविरुद्ध जबरी चोरी, मारहाण आणि धमकीचे गुन्हे दाखल करण्यात आले असून, आरोपींचा शोध सुरू आहे. फिर्यादीने आरोपी पुन्हा समोर आल्यास ओळखू शकत असल्याचे पोलिसांना सांगितले आहे.
