पुणे: पुणे, पिंपरी-चिंचवड आणि हिंजवडी आयटी पार्कमध्ये दररोज प्रवास करणाऱ्या लाखो नागरिकांसाठी मोठा दिलासा देणारी बातमी समोर आली आहे. माण-हिंजवडी ते शिवाजीनगर मेट्रो मार्गिका 3 च्या पहिल्या टप्प्याला मेट्रो रेल्वे सुरक्षा आयुक्तांकडून (CMRS) प्रवासी सेवा सुरू करण्यासाठी तात्पुरती मंजुरी मिळाली आहे. त्यामुळे या मार्गावर लवकरच मेट्रो धावणार असल्याचे जवळपास निश्चित झाले आहे.
या टप्प्यात माण ते आर. के. लक्ष्मण म्युझियम, बालेवाडीपर्यंतचा सुमारे 13 किलोमीटर लांबीचा मार्ग तयार करण्यात आला आहे. या मार्गावर एकूण 12 मेट्रो स्थानके उभारण्यात आली आहेत. हिंजवडी आयटी पार्क, बालेवाडी आणि आसपासच्या परिसरातील नागरिकांना या मार्गाचा मोठा फायदा होणार असून, वाहतूक कोंडी कमी करण्यासाठी ही मेट्रो महत्त्वाची भूमिका बजावणार आहे.
या मेट्रो मार्गाचे उद्घाटन पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या उपस्थितीत करण्याचे नियोजन सुरू असल्याची माहिती मिळत आहे. उद्घाटनाची तारीख अद्याप जाहीर करण्यात आलेली नसली, तरी आवश्यक तयारी अंतिम टप्प्यात आहे.
CMRS च्या अधिकाऱ्यांनी 5 ते 8 जुलैदरम्यान संपूर्ण मार्गाची सविस्तर पाहणी केली असून सर्व चाचण्या यशस्वी झाल्यानंतर 23 जुलै रोजी प्रवासी वाहतुकीसाठी मंजुरी देण्यात आली. आता उर्वरित प्रशासकीय प्रक्रिया पूर्ण झाल्यानंतर ऑगस्टच्या पहिल्या आठवड्यात मेट्रो सेवा सुरू होण्याची शक्यता व्यक्त केली जात आहे. त्यामुळे हिंजवडी, बालेवाडी, पुणे आणि पिंपरी-चिंचवड दरम्यानचा प्रवास अधिक जलद आणि सोयीस्कर होणार आहे.
