लोणी काळभोर, ता. २८ : थेऊर (ता. हवेली) येथील डी. वाय. पाटील यांच्या शेतालगत असलेल्या केळीच्या बागेजवळ तीन पत्ती जुगाराचा डाव रंगला होता. परंतु, लोणी काळभोर पोलिसांनी धाड टाकून नऊ जणांना रविवारी (ता. 26 जुलै) सायंकाळी पावणे पाच वाजण्याच्या सुमारास रंगेहात ताब्यात घेतले. या कारवाईत रोख रक्कम व जुगाराचे साहित्य जप्त करण्यात आले असून, सर्व आरोपींविरुद्ध महाराष्ट्र जुगार प्रतिबंध अधिनियमाच्या कलम 12 (अ) अन्वये गुन्हा दाखल करण्यात आला आहे.
विकास महादेव धारवाड (वय 35, रा. भील्ल वस्ती थेऊर ता हवेली जि पुणे), सचिन आबा कांबळे (वय 33, रा. भीम नगर थेऊर ता हवेली जि पुणे), सागर चुनिलाल जाधव (वय 33, हाऊस किपींग रा. चव्हाण वस्ती थेऊर ता हवेली जि पुणे), समिर दत्तात्रय सरवदे (वय 32, ड्रायव्हर रा. भीम नगर थेऊर ता हवेली जि पुणे), किशोर सुनिल जाधव (वय 27, रा. दत्त नगर थेऊर ता हवेली जि पुणे), रशीद बशीर शेख (वय 45, रा. सखारामनगर थेऊर ता हवेली जि पुणे), तानाजी हरी जाधव (वय 35, धंदा ड्रायव्हर रा. काळेवस्ती थेऊर ता हवेली जि पुणे), आकाश विजय वाघमारे (वय 26, रा. काळेवस्ती थेऊर ता हवेली जि पुणे) व सचिन नागु धुळे (वय 42, धंदा मासेविक्री रा. भीम नगर थेऊर ता हवेली जि पुणे) अशी गुन्हा दाखल करण्यात आलेल्यांची नावे आहेत. याप्रकरणी पोलीस अंमलदार गणेश बाळासाहेब खरात यांनी सरकारतर्फे लोणी काळभोर पोलीस ठाण्यात फिर्याद दिली
पोलिसांनी दिलेल्या माहितीनुसार, लोणी काळभोर पोलीस ठाण्याचे पोलीस उपनिरीक्षक योगेश पैठणे यांच्या मार्गदर्शनाखाली तपास पथक पोलीस ठाण्याच्या हद्दीत अवैध धंद्यांविरोधात पेट्रोलिंग करत होते. त्यावेळी पोलीस कर्मचारी अशोकगिरी यांच्या गोपनीय बातमीदाराकडून मौजे थेऊर येथील डी. वाय. पाटील यांच्या शेतामध्ये, खडकूत परिसरातील केळीच्या बागेजवळ नदीकाठी काही जण पैशांवर तीन पत्ती जुगार खेळत आहेत. अशी माहिती एका खबऱ्यामार्फत मिळाली होती.
मिळालेल्या माहितीचा खातरजमा करून वरिष्ठांच्या आदेशानुसार दोन पंचांना सोबत घेत पोलिसांनी छापा टाकला. पोलिसांना पाहताच, जुगार खेळणाऱ्यांमध्ये एकच धावपळ उडाली. काहींनी हातातील पत्ते व रोख रक्कम टाकून पळून जाण्याचा प्रयत्न केला. मात्र, पोलिसांनी तत्परता दाखवत विकास धारवाड, सचिन कांबळे, सागर जाधव, समीर सरवदे, किशोर जाधव, रशीद शेख, तानाजी जाधव, आकाश वाघमारे आणि सचिन धुळे या नऊ जणांना ताब्यात घेतले.
दरम्यान, या कारवाईदरम्यान घटनास्थळावरून १ हजार २६० ची रोख रक्कम, तीन पत्तीचे पत्ते, पत्त्याचे पाकीट तसेच जुगारासाठी वापरलेले साहित्य जप्त करण्यात आले. पंचांसमक्ष मुद्देमाल सीलबंद करून जप्त करण्यात आला. सर्व आरोपींविरुद्ध महाराष्ट्र जुगार प्रतिबंध अधिनियमांतर्गत गुन्हा दाखल करण्यात आला आहे. पुढील तपास लोणी काळभोर पोलीस करीत आहेत.
