लोणी काळभोर, ता. २८ : सोलापूर जनता सहकारी बँकेकडून मंजूर करण्यात आलेल्या तब्बल 4 कोटींच्या कर्जप्रकरणात न्यायालयाच्या आदेशाने सील करून बँकेच्या ताब्यात देण्यात आलेल्या मालमत्तेचे कुलूप तोडून अनधिकृतपणे पुन्हा ताबा घेतल्याचा गंभीर प्रकार उघडकीस आला आहे. या प्रकरणी कर्जदार, त्याची पत्नी, वडील, आई तसेच इतर संबंधितांविरुद्ध लोणी काळभोर पोलीस ठाण्यात गुन्हा दाखल करण्यात आला आहे.
दत्तात्रय पांडुरंग जवळकर, त्यांची पत्नी वर्षा जवळकर, पांडुरंग लक्ष्मण जवळकर, सुभद्रा पांडुरंग जवळकर (सर्व. रा. आळंदी म्हातोबाची, ता. हवेली) याबाबत सोलापूर जनता सहकारी बँकेच्या मार्केटयार्ड शाखेतील ज्युनियर ऑफिसर नितीन मुरलीधर अंबुरे (वय ५७) यांनी फिर्याद दिली आहे.
पोलिसांनी दिलेल्या माहितीनुसार, मौजे आळंदी म्हातोबाची (ता. हवेली) येथील पांडुरंग जवळकर यांच्या मालकीची तारण ठेवलेली मालमत्ता बँकेकडे गहाण होती. या मालमत्तेच्या आधारे दत्तात्रय जवळकर यांनी २९ ऑक्टोबर २०१५ रोजी खेळते भांडवलासाठी 4 कोटींचे कर्ज घेतले होते. सुरुवातीला काही हप्ते भरल्यानंतर कर्जदाराने परतफेड थांबविल्याने बँकेने वारंवार नोटिसा, फोन तसेच प्रत्यक्ष भेटीद्वारे पाठपुरावा केला. मात्र, त्यास कोणताही प्रतिसाद मिळाला नाही.
सततच्या थकबाकीमुळे संबंधित कर्ज खाते ३१ ऑगस्ट २०१७ रोजी एनपीए (अनुत्पादित कर्ज) म्हणून घोषित करण्यात आले. त्यानंतरही बँकेने कर्ज फेडण्याची संधी दिली. मात्र थकबाकी न भरल्याने सरफेसी कायदा, २००२ अंतर्गत न्यायालयीन प्रक्रिया सुरू करण्यात आली. मुख्य न्यायदंडाधिकारी, पुणे यांच्या आदेशानुसार १२ मार्च २०२६ रोजी न्यायालय नियुक्त कोर्ट कमिशनर अॅड. विजय कोंढाळकर यांनी पोलीस बंदोबस्तात संबंधित मालमत्तेचा प्रत्यक्ष ताबा घेतला. मालमत्तेला कुलूप लावून सील करण्यात आले तसेच ताबा नोटीस लावून संपूर्ण मालमत्ता बँकेच्या ताब्यात देण्यात आली.
मात्र, ६ एप्रिल २०२६ रोजी सकाळी बँकेचे अधिकारी घटनास्थळी पोहोचले असता, न्यायालयाच्या आदेशाने लावलेले कुलूप, कडी-कोयंडा आणि सील तोडण्यात आल्याचे निदर्शनास आले. तसेच ताबा नोटीस काढून टाकून कर्जदार दत्तात्रय पांडुरंग जवळकर, त्यांची पत्नी वर्षा जवळकर, पांडुरंग लक्ष्मण जवळकर, सुभद्रा पांडुरंग जवळकर आणि इतरांनी संबंधित मालमत्तेत बेकायदेशीररित्या प्रवेश करून पुन्हा कब्जा केल्याचे फिर्यादीत नमूद करण्यात आले आहे.
दरम्यान, या प्रकारामुळे न्यायालयाच्या आदेशाचे उल्लंघन झाल्याबरोबरच बँकेच्या ताब्यातील मालमत्तेचे नुकसान झाल्याचा आरोप करण्यात आला आहे. फिर्यादीच्या तक्रारीवरून लोणी काळभोर पोलिसांनी संबंधित चौघांसह इतरांविरुद्ध विविध कलमान्वये गुन्हा दाखल करून पुढील तपास सुरू केला आहे.
