नवी दिल्ली: आगामी लोकसभा निवडणुकीपूर्वी काँग्रेसला आणखी एक धक्का बसल्याचे दिसत आहे. बिहारमध्ये नितीश कुमार वेगळे होऊन एनडीएमध्ये दाखल झाल्यानंतर आता काँग्रेस सरचिटणीस प्रियंका गांधी यांचे निकटवर्तीय आचार्य प्रमोद कृष्णम हेही पक्षापासून वेगळे होताना दिसत आहेत. त्यांनी काँग्रेसचे राष्ट्रीय अध्यक्ष मल्लिकार्जुन खर्गे यांच्यावर जोरदार टीका केली आहे.
आचार्य प्रमोद कृष्णम म्हणाले की, मोठ्या नेत्याने आपली प्रतिष्ठा आणि भाषेची काळजी घेतली पाहिजे. कार्यकर्त्यांमधून पक्ष निर्माण होतो. कार्यकर्ता मेहनती आणि धाडसी असतो. हा कोणा एका पक्षाचा प्रश्न नाही, सर्व पक्ष कार्यकर्त्यांच्या रक्त आणि घामाच्या पायावर उभे आहेत. काँग्रेसही कार्यकर्त्यांच्या पायावर उभी असल्याचे ते म्हणाले. या संदर्भात ज्या प्रकारची भाषा वापरली गेली, ती केवळ मलाच नाही तर सर्व कार्यकर्त्यांना दुखावणारी आहे. याबद्दल खर्गे यांनी माफी मागितली पाहिजे.
‘राहुल गांधींना संदेश दिला जात नाही’
आचार्य प्रमोद कृष्णम इथेच थांबले नाहीत. त्यांनी राहुल गांधींवरही निशाणा साधला. प्रमोद कृष्णम म्हणाले की, मला एक वर्षापासून राहुल गांधींना भेटायचे आहे, पण त्यांना भेटता येत नाही. यामागचे एक कारण हे देखील असू शकते की कदाचित माझा संदेश त्यांच्यापर्यंत पोहोचवला जात नाही. तर, पंतप्रधान कार्यालयाला फोन केल्यानंतर पंतप्रधान नरेंद्र मोदींनी त्यांना चार दिवसांनी भेटीची वेळ दिली.
2019 मध्ये काँग्रेसकडून उमेदवार
आचार्य प्रमोद कृष्णम यांनी अलीकडेच पंतप्रधान नरेंद्र मोदी यांची भेट घेतली होती आणि पंतप्रधानांना दैवी शक्तीचा आशीर्वाद असल्याचे सांगितले होते. यानंतर 4 फेब्रुवारीला त्यांनी संरक्षण मंत्री राजनाथ सिंह यांचीही भेट घेतली. याशिवाय त्यांनी सोमवारी (५ फेब्रुवारी) लोकसभेत झालेल्या पंतप्रधान मोदींच्या भाषणाचेही कौतुक केले.
या दोन्ही भेटीनंतर आणि पंतप्रधानांच्या सततच्या स्तुतीनंतर प्रमोद कृष्णम काँग्रेस सोडून भाजपमध्ये प्रवेश करतील, अशी शक्यता वर्तवली जात आहे. 2019 च्या लोकसभा निवडणुकीत राजनाथ सिंह यांच्या विरोधात आचार्य प्रमोद कृष्ण हे लखनौमधून काँग्रेसच्या तिकिटावर उमेदवार होते .
