पुणे : पुणे शहर आणि परिसरातील सीएनजीचा कमी दाब व अपुऱ्या गॅस पुरवठ्यामुळे निर्माण झालेले गंभीर संकट अद्याप कायम असून, या प्रश्नावर महाराष्ट्र नॅचरल गॅस लिमिटेड (MNGL) कडून कोणताही ठोस तोडगा न निघाल्याने पुणे पेट्रोल डीझेल असोसिएशनने Petrol Dealers Association Pune (PDAP) आता थेट केंद्रीय पेट्रोलियम व नैसर्गिक वायू मंत्री हरदीपसिंह पुरी यांच्या तातडीच्या हस्तक्षेपाची मागणी केली आहे.
एमएनगीएलकडे वारंवार लेखी निवेदने, प्रत्यक्ष बैठका आणि पेट्रोलियम व नैसर्गिक वायू नियामक मंडळ (PNGRB) यांच्याकडेही पाठपुरावा करूनही परिस्थितीत कोणतीही सुधारणा झालेली नाही. उलट, अलीकडेच PDAP ने MNGL ला निश्चित कालमर्यादेसह कृती आराखडा सादर करण्याची मागणी करणारे सविस्तर निवेदन दिले होते. मात्र, त्यालाही अद्याप कोणताही प्रतिसाद मिळालेला नसल्याचा आरोप करण्यात आला आहे.
सध्या कमी गॅस दाबामुळे पुण्यातील अनेक CNG पंपांवर वाहनांच्या लांबच लांब रांगा लागत आहेत. हजारो वाहनचालकांना तासन्तास प्रतीक्षा करावी लागत असून, पंपचालकांना आर्थिक फटका बसत आहे. ग्राहकांचा रोष सहन करावा लागत असतानाच काही ठिकाणी वाहतूक कोंडी झाल्याच्या कारणावरून वाहतूक पोलिसांकडून CNG पंपचालकांना नोटिसाही बजावण्यात आल्याने डीलर्समध्ये तीव्र नाराजी आहे.
याशिवाय, विद्यमान CNG केंद्रांवरील ताण कमी करण्यासाठी प्रस्तावित DBS (Daughter Booster Station) फीडिंग व्यवस्था किंवा इतर पर्यायी उपाययोजनांबाबत MNGL कडून कोणतीही स्पष्ट भूमिका किंवा अंमलबजावणीचा कालावधी जाहीर करण्यात आलेला नसल्याने प्रश्न अधिकच गंभीर बनला आहे.
या पार्श्वभूमीवर PDAP ने केंद्रीय पेट्रोलियम मंत्र्यांची तातडीने भेट घेण्याचा निर्णय घेतला आहे. गॅसचा दाब पूर्ववत करणे, आवश्यक पायाभूत सुविधा युद्धपातळीवर उभारणे, अंतरिम पुरवठा व्यवस्था सुरू करणे आणि MNGL च्या त्रुटींमुळे CNG पंपचालकांवर होणारी अन्यायकारक कारवाई थांबविण्यासाठी केंद्र सरकारने तातडीने हस्तक्षेप करावा, अशी संघटनेची मागणी आहे.
पुणे पेट्रोल डीझेल असोसिएशनचे अध्यक्ष ध्रुव रूपारेल म्हणाले, “पुण्यातील लाखो नागरिकांना दररोज केवळ CNG भरण्यासाठी तासन्तास रांगेत उभे राहावे लागत आहे, ही अत्यंत गंभीर आणि अस्वीकार्य परिस्थिती आहे. गॅस पुरवठ्यावर आमचे कोणतेही नियंत्रण नसतानाही पंपचालकांना नागरिकांच्या रोषाला सामोरे जावे लागत आहे. वाहतूक कोंडीची जबाबदारीही आमच्यावर टाकली जात आहे. MNGL आणि संबंधित यंत्रणांकडे सातत्याने पाठपुरावा करूनही कोणताही ठोस निर्णय होत नसल्याने आता केंद्रीय पेट्रोलियम मंत्र्यांनी स्वतः हस्तक्षेप करून पुणेकरांना तातडीने दिलासा द्यावा.”
दरम्यान, सतत वाढत चाललेल्या या संकटामुळे पुण्यातील CNG व्यवस्था कोलमडण्याच्या उंबरठ्यावर असून, आता केंद्र सरकारच्या हस्तक्षेपानंतरच या प्रश्नावर तोडगा निघणार का, याकडे पुणेकरांचे लक्ष लागले आहे.
