अयोध्या : श्रीराम जन्मभूमी मंदिराच्या प्रशासनात महत्त्वाची नियुक्ती करण्यात आली आहे. मंदिराच्या व्यवस्थापनासाठी श्री राम जन्मभूमी तीर्थ क्षेत्र ट्रस्टने पहिल्यांदाच मुख्य कार्यकारी अधिकारी म्हणजेच CEO पदाची नियुक्ती केली आहे. भारतीय हवाई दलातून निवृत्त झालेले एअर मार्शल जितेंद्र मिश्रा यांच्याकडे ही जबाबदारी सोपवण्यात आली आहे. ते पुढील 3 वर्षे CEO म्हणून काम पाहणार आहेत.
जितेंद्र मिश्रा यांनी भारतीय हवाई दलात तब्बल 38 वर्षे सेवा केली आहे. त्यांच्या कारकिर्दीत त्यांनी लढाऊ विमानांचे वैमानिक, कॉम्बॅट इन्स्ट्रक्टर आणि टेस्ट पायलट म्हणून विविध जबाबदाऱ्या पार पाडल्या. कारगिल युद्धाच्या काळातही त्यांनी महत्त्वाची भूमिका बजावली होती. याशिवाय ‘ऑपरेशन सिंदूर’मध्येही त्यांनी योगदान दिल्याची माहिती आहे. एप्रिल 2026 मध्ये ते हवाई दलातून निवृत्त झाले.
CEO पदासाठी 5500 पेक्षा जास्त अर्ज प्राप्त झाल्याची माहिती आहे. त्यातून 18 उमेदवारांची निवड करून पुढील प्रक्रिया करण्यात आली. उमेदवारांची विविध स्तरांवर पडताळणी करण्यात आली. त्यांची जीवनशैली, धार्मिक बाबी आणि इतर संबंधित विषयांवरही प्रश्न विचारण्यात आल्याचे सांगण्यात येते. या निवड प्रक्रियेसाठी 3 सदस्यांची समिती तयार करण्यात आली होती. निवृत्त न्यायमूर्ती प्रमोद कोहली, विष्णुकांत चतुर्वेदी आणि सुरेश हावडे यांचा या समितीत समावेश होता.
CEO म्हणून मिश्रा यांच्यासमोर मंदिराच्या दैनंदिन प्रशासनापासून आर्थिक आणि कायदेशीर व्यवस्थापनापर्यंत अनेक महत्त्वाच्या जबाबदाऱ्या असतील. भाविकांसाठी सुविधा, मंदिराची सुरक्षा, प्रशासकीय कामकाज आणि आर्थिक व्यवहारांमध्ये पारदर्शकता राखणे यावर त्यांना लक्ष द्यावे लागणार आहे.
मंदिरातील दानाच्या रकमेच्या चोरीचे प्रकरण समोर आल्यानंतर व्यवस्थापनाबाबत प्रश्न उपस्थित झाले होते. त्यानंतर मंदिराचा कारभार अधिक सक्षम करण्यासाठी स्वतंत्र CEO पदाची आवश्यकता व्यक्त करण्यात आली होती.
