पुणे: पुण्यातील वारजे परिसरात ‘दृश्यम’ शैलीतील थरारक (Pune Crime) हत्याकांड उघडकीस आले आहे. येथील एका (Pune News) व्यवसायिकाने पत्नीच्या विवाहबाह्य संबंधांच्या संशयावरून तिची निर्घृण हत्या केली आहे. पत्नीचा खून केल्यानंतर पुरावे नष्ट करून ती हरवल्याची तक्रार पोलिसांत दाखल करण्यात आली होती. मात्र पोलिस तपासात या गुन्ह्याचा पर्दाफाश झाला असून या प्रकरणाचा पहिला सीसीटीव्ही फुटेजही समोर आला आहे.
पोलिसांनी दिलेल्या माहितीनुसार, आरोपी पतीने पत्नीच्या कथित प्रेमसंबंधांच्या संशयावरून तिचा गळा आवळून खून केला आणि मृतदेह नदीत फेकून दिला. या जोडप्याचा भेळ खाण्यासाठी गेलेल्या ठिकाणाचा सीसीटीव्ही फुटेज आता समोर आला आहे. या व्हिडिओमध्ये आरोपी पती पत्नीला घेऊन जात असल्याचे स्पष्ट दिसते. तपासात समोर आले की, भेळ खात असतानाच आरोपीने पत्नीचा गळा दाबून तिचा खून केला होता.
हत्या केल्यानंतर आरोपीने पुरावे नष्ट करण्यासाठी विविध युक्त्या आखल्या आणि नंतर पोलिसांकडे पत्नी हरवल्याची खोटी तक्रार दिली. वारजे पोलिसांनी तपास सुरू केल्यानंतर संपूर्ण प्रकरणाचा उलगडा झाला. आरोपीचे नाव समीर पंजाबराव जाधव असे असून, हत्या झालेल्या पत्नीचे नाव अंजली समीर जाधव (वय 38) असे आहे.
तपासात असे निष्पन्न झाले की, अंजलीचे एका व्यक्तीशी प्रेमसंबंध असल्याचा संशय समीरला आला होता. तिच्या मोबाईलवरील चॅट्स पाहिल्यानंतर त्यांच्या दरम्यान अनेकदा वाद झाले. पत्नी सुधारत नसल्याचे पाहून समीरने तिचा खून करण्याचा निर्णय घेतला. त्यासाठी त्याने शिंदेवाडी येथे 18 हजार रुपये भाड्याने एक गोदाम घेतले. त्या ठिकाणी लोखंडी बॉक्स तयार करून ठेवला आणि लाकडाची पोती आणून खून करण्याची संपूर्ण तयारी केली.
26 ऑक्टोबर रोजी समीरने अंजलीला कारने फिरायला नेले. नवले ब्रिजमार्गे खेडशिवापूर आणि मरीआई घाट परिसरात फिरवल्यानंतर परतीच्या प्रवासात शिंदेवाडी येथे थांबून भेळ खाण्याचा बहाणा केला. दोघे गोदामात चटईवर बसून भेळ खात असताना त्याने अचानक अंजलीचा गळा दाबून तिचा खून केला. त्यानंतर पत्नीचा मृतदेह लोखंडी बॉक्समध्ये ठेवून पेट्रोल ओतून जाळला, राख नदीपात्रात टाकली आणि बॉक्स भंगारात विकून टाकला.
या प्रकाराने परिसरात खळबळ उडाली असून वारजे पोलिसांनी या हत्याकांडाचा तपास अधिक गतीने सुरू केला आहे. या प्रकरणात सीसीटीव्ही फुटेज, मोबाईल चॅट्स आणि इतर पुरावे पोलिसांच्या हाती लागले असून आरोपीला अटक करण्यात आली आहे.
