पुणे : पुणे महानगर परिवहन महामंडळाच्या बससेवेच्या दरात येत्या १ जूनपासून वाढ होत आहे. त्यामुळे प्रवाशांच्या खिशाला कात्री बसणार आहे.पुणे व पिंपरी-चिंचवडमध्ये सुधारित स्टेज रचनेनुसार नव्या दरांची अंमलबजावणी होणार आहे. दहा वर्षानंतर पीएमपीएमएलच्या भाड्यात वाढ करण्यात आली आहे.
महाराष्ट्र शासनाच्या ३१ मार्च २०१८ रोजीच्या राजपत्रानुसार, तसेच इतर परिवहन संस्थांच्या दरवाढीच्या धर्तीवर पीएमपीएमएलने प्रवासात सुसूत्रता येण्यासाठी स्टेज रचनेत बदल केला आहे. ५ ते १० किमी अंतरावर आधारित ११ स्टेज निश्चित केल्या आहेत. या रचनेनुसार १ किमी ते ८० किमीपर्यंत प्रवास करणाऱ्या प्रवाशांना सुधारित तिकीट दर लागू होणार आहेत. यास पीएमपीएमएलच्या संचालक मंडळ आणि प्रादेशिक परिवहन प्राधिकरण, पुणे यांनी मान्यता दिली आहे.
असे असणार नवीन दर
प्रवासाचे एकूण ११ टप्पे
एक ते ३० किलोमीटर अंतरासाठी दर पाच किलोमीटर अंतराने सहा टप्पे
३० ते ८० किलोमीटरसाठी दहा किलोमीटर अंतराने पाच टप्पे
५ किमीपर्यंतसाठी १० रुपये
५.१ ते १० किमी २० रुपये
१०.१ ते १५ किमी ३० रुपये
१५.१ ते २० किमी ४० रुपये
दरम्यान या बस प्रवासासोबत दैनंदिन आणि मासिक पासचे दरही वाढवण्यात आले आहेत.पुणे व पिंपरी-चिंचवडमध्ये दैनंदिन पाससाठी पूर्वी ४० रुपये लागत होते. आता त्याला ७० रुपये लागणार आहे. पीएमआरडीए हद्दीत पाससाठी आता १२० रुपयांऐवजी १५० रुपये लागणार आहेत. तसेच मासिक पास ९०० रुपयांऐवजी १५०० रुपये लागणार आहेत .
