पुणे : बैलगाडा शर्यतीतील वादातुन सणसवाडी येथे एका ‘थार ‘ गाडीने दुचाकीला जोरदार धडक दिल्याची धक्कादायक घटना समोर आली आहे. या भीषण अपघातात दोघे जण गंभीर जखमी झाले असून, याप्रकरणी शिक्रापूर पोलिसांनी दोन जणांवर गुन्हा दाखल केला आहे. संतोष मोडक आणि प्रज्वल मोडक (दोघे रा. वडकी, ता. हवेली) अशी गुन्हा दाखल झालेल्या संशयितांची नावे आहेत.
मिळालेल्या माहितीनुसार, सणसवाडी येथील गव्हाळे वस्तीत राहणारे चेतन गणपत हरगुडे (वय 27) हे जॉन डिअर कंपनीत कामाला असून ते त्यांच्या मामांसोबत बैलगाडा शर्यतीचे बैल सांभाळतात. 10 जुलै रोजी सोलापूर जिल्ह्यातील माळशिरस येथील एका बैलगाडा शर्यतीदरम्यान संतोष मोडक यांनी हरगुडे यांच्या बैलांबद्दल स्टेजवरून आक्षेपार्ह टिप्पणी केली होती. हा प्रकार युट्यूबच्या थेट प्रक्षेपणात पाहिल्यानंतर हरगुडे यांनी मोडक यांना फोन करून विचारणा केली, ज्यावर त्यांना शिवीगाळ व धमकी देण्यात आली.
दुसऱ्या दिवशी सकाळी देखील आरोपींनी फोनवरून मारहाणीची धमकी दिली होती, अशी माहिती समोर आली आहे.दरम्यान 12 जुलै रोजी चेतन हरगुडे यांच्या आजोबांचे निधन झाले होते, त्यामुळे सर्व कुटुंबीय घरीच हजर होते. दुपारच्या सुमारास काळी थार गाडी त्यांच्या घराभोवती संशयास्पदरीत्या फेऱ्या मारत होती. दरम्यान, आरोपी संतोष मोडक याने चेतनचे मामा महेंद्र कुटे यांना कॉन्फरन्स कॉलवर संपर्क साधून चेतनला घराबाहेर पडू न देण्याची धमकी दिली.
त्यानंतर काही वेळातच या थार गाडीने चेतन हरगुडे यांच्या दुचाकीला जोरदार धडक दिली. या जीवघेण्या हल्ल्यात दोघे जण गंभीर जखमी झाले.या घटनेनंतर चेतन हरगुडे यांनी दिलेल्या तक्रारीवरून शिक्रापूर पोलिसांनी भारतीय न्याय संहिताच्या कलम 109 आणि 3(5) अंतर्गत गुन्हा नोंदवला आहे. पोलीस या प्रकरणाचा पुढील तपास करत आहेत.
