पुणे : पिंपरी-चिंचवडमधील गणपती विसर्जन मिरवणुकीत ठरवून दिलेल्या मर्यादेपेक्षा जास्त आवाजात डीजे आणि डॉल्बी साउंड वाजवणे गणेश मंडळांना चांगलेच महागात पडले आहे. सांगवी पोलिसांनी नियमांचे उल्लंघन करणाऱ्या शहरातील सुमारे 9 ते 10 गणेश मंडळांवर गुन्हे दाखल केले असून, मिरवणुकीतील मोठ्या प्रमाणातील डीजे साहित्य जप्त केले आहे.
गणेशोत्सवाच्या सुरुवातीपासूनच पुण्यात डीजेच्या अति-आवाजा वरून वाद सुरू होते. या पार्श्वभूमीवर पिंपरी-चिंचवड पोलिसांनी विसर्जन मिरवणुकीत ध्वनी प्रदूषणाचे नियम पाळण्याचे कडक आदेश दिले होते. जास्त आवाजात डॉल्बी न वाजवण्याबाबत मंडळांना वारंवार पूर्वसूचनाही देण्यात आल्या होत्या. मात्र, विसर्जन मिरवणुकीदरम्यान काही मंडळांनी या सूचनांकडे दुर्लक्ष करत नियमांपेक्षा खूप जास्त आवाजात डीजे वाजवल्याचे पोलिसांच्या निदर्शनास आले.
नियम धाब्यावर बसवणाऱ्या या मंडळांवर सांगवी पोलिसांनी थेट कायदेशीर कारवाईचा बडगा उगारला. या कारवाईदरम्यान पोलिसांनी 5 डीजे मिक्सर, 2 डीजे कन्सोल, 1 लाईट कंट्रोल मशीन, 3 लॅपटॉप, 1 स्पीकर, डीजे सेट तसेच ट्रॅक्टर-ट्रॉली असा महत्त्वपूर्ण मुद्देमाल ताब्यात घेतला आहे. या प्रकरणाचा पुढील तपास सध्या सांगवी पोलीस करत आहेत.
मिरवणुकीचा उत्साह आणि जल्लोष टिकवून ठेवतानाच नागरिकांना होणारा त्रास टाळण्यासाठी ध्वनी मर्यादा पाळणे बंधनकारक असल्याचे प्रशासनाने स्पष्ट केले होते. पोलिसांच्या या अचानक झालेल्या धडक कारवाईमुळे नियमांचे उल्लंघन करणाऱ्या इतर मंडळांमध्ये मोठी खळबळ उडाली आहे. आगामी काळातही ध्वनी प्रदूषणाचे नियम मोडणाऱ्यांवर अशीच कठोर कारवाई केली जाईल, असा इशारा पोलिसांनी दिला आहे.
