राहुलकुमार अवचट
यवत – स्वातंत्र्याचे अमृत महोत्सववर्ष संपूर्ण देशभरात उत्साहपुर्ण वातावरणात साजरे होत असताना आज यवत पोलीस स्टेशन, यवत ग्रामपंचायत, यवत प्राथमिक विद्यालय व विद्या विकास मंदिर माध्यमिक विद्यालय यवत यांच्या संयुक्त विद्यमाने भव्य जनजागृती फेरीचे आयोजन करण्यात आले होते.
फेरीची सुरुवात यवत विद्या विकास मंदिर येथून झाली. यावेळी रिमझिम पावसाआसुनही विद्यार्थ्यांमध्येचा उत्साह होता. हातामध्ये तिरंगा ध्वज , भारत माता की जय , वंदे मातरमच्या घोषणांनी परिसर दुमदुमून निघाला होता. मुख्य बाजारपेठ, गावठाण व संपूर्ण गावातून जनजागृती फेरीचे आयोजन करण्यात आले होते.
यावेळी विद्यार्थ्यांच्या कलागुणांना वाव देण्यासाठी प्राथमिक व माध्यमिक विद्यार्थी व विद्यार्थिनींसाठी रांगोळी व चित्रकला स्पर्धेचे आयोजन करण्यात आले होते. या दालनांचे उद्घाटन पोलीस निरीक्षक नारायण पवार यांच्या हस्ते झाले. यावेळी रांगोळी व चित्रकलेतून मुलांनी विविध महापुरुषांची अतिशय सुंदर चित्रे व सुबक रांगोळ्या काढलेल्या पाहावयास मिळाल्या. जनजागृती फेरीची सांगता प्राथमिक विद्यालय येथे करण्यात आली.
यावेळी यवत पोलीस स्टेशनचे पोलीस निरीक्षक नारायण पवार यांनी उपस्थित विद्यार्थी व नागरिकांना भारत देशाच्या स्वातंत्र्याच्या अमृत महोत्सवी वर्षानिमित्त शुभेच्छा देत देशाचा अमृत महोत्सव आनंदात साजरा करावा असे आवाहन केले यावेळी सरपंच समीर दोरगे, उपसंरपच सुभाष यादव, विद्यालयाचे प्राचार्य मासाळ, प्राथमिक शाळेचे मुख्याध्यापक रामभाऊ दोरगे, यवत पोलीस स्टेशनचे सहाय्यक पोलिस निरीक्षक स्वप्निल लोखंडे, उपनिरीक्षक संजय नागरगोजे यांसह पोलीस कर्मचारी, ग्रामपंचायतचे सर्व कर्मचारी विद्यार्थी, पालक ग्रामस्थ मोठ्या उपस्थित होते.
