खेड शिवापूर : श्रीरामनगर (ता. हवेली) येथील श्रीनाथ ज्वेलर्सवर सशस्त्र दरोडा टाकून सोन्याच्या पाच अंगठ्या लंपास करणाऱ्या चार संशयितांना राजगड पोलिसांनी अवघ्या 12 तासांत अटक केली. शुक्रवारी (ता. 16) रात्री आठच्या सुमारास घडलेल्या या घटनेत सुमारे साडेतीन लाख रुपये किमतीचे सोने लुटण्यात आले होते.
ईश्वर गोपीनाथ वाघमारे (वय-30, रा. वांगी बुद्रुक, ता. धाराशिव), शैलेश हरीश साबळे (वय-21), करण गोपाळ हजारे (वय -21) आणि तानाजी नामदेव लोंढे (वय-39, तिघे रा. शिवाजीनगर, खेड शिवापूर, ता. हवेली) अशी अटक केलेल्या संशयितांची नावे आहेत.
पोलिसांनी दिलेल्या माहितीनुसार, शुक्रवारी रात्री काळ्या रंगाचे बुरखे परिधान केलेल्या चार जणांनी श्रीनाथ ज्वेलर्समध्ये प्रवेश केला. त्यानंतर कोयता आणि बंदुकीसारख्या शस्त्रांचा धाक दाखवून दुकानातील सोन्याच्या पाच अंगठ्या घेऊन त्यांनी घटनास्थळावरून पळ काढला.
घटनेची माहिती मिळताच राजगड पोलिसांनी तपासाला वेग दिला. तांत्रिक माहिती आणि तपासाच्या आधारे संशयितांची ओळख पटवून पोलिसांनी चौघांना 12 तासांच्या आत अटक केली. या प्रकरणाचा पुढील तपास राजगड पोलीस करत आहेत.
