पुणे : देशभरातील लाखों विद्यार्थ्यांच्या भविष्याशी संबधित असलेल्या नीट (NEET) 2026 परीक्षा पेपरफुटी प्रकरणाचा पर्दाफाश केंद्रीय अन्वेषण विभागाने केला आहे. CBI ने प्रकरणाचे मूळ शोधून काढत न्यायालयात हजारो पानांचे दोषारोपपत्र दाखल केले आहे. नॅशनल टेस्टिंग एजन्सीच्या कमिटीवर असलेल्या तीन विषयांच्या तज्ज्ञांनीच गोपनीयतेचा भंग करून हा पेपर फोडल्याचे तपासात निष्पन्न झाले आहे.
तज्ज्ञ मनीषा हवालदार, प्रल्हाद कुलकर्णी,मनीषा मांढरे या तिघांनी स्वतःच्या पदाचा आणि गोपनीय अधिकारांचा गैरवापर करत प्रश्नपत्रिका बाहेर काढल्या:
भौतिकशास्त्र: तज्ज्ञ मनीषा हवालदार यांनी दिल्लीतील NTA परिसरातून बाहेर पडल्यानंतर आठवणीत असलेले प्रश्न लिहून काढले. हे प्रश्न त्यांनी पुण्यातील कोचिंग सेंटरचे शिक्षक तेजस शाह यांच्यापर्यंत पोहोचवले.
रसायनशास्त्र: तज्ज्ञ प्रल्हाद कुलकर्णी यांनी रफ वर्कच्या छोट्या कागदांवर प्रश्न-उत्तरे लिहून घेतली आणि हॉटेलमध्ये ते उतरवून काढले. हे प्रश्न लातूरचे डॉ. मनोज शिरुरे यांच्यामार्फत लातूरमधील RCC कोचिंगचे मालक शिवराज मोटेगावकर यांच्यापर्यंत तसेच दुसऱ्या मार्गाने मनीषा वाघमारे यांच्यापर्यंत गेले.
जीवशास्त्र: तज्ज्ञ मनीषा मांढरे यांनी जीवशास्त्राचे प्रश्न मध्यस्थ मनीषा वाघमारे यांना दिले. वाघमारे यांनी धनंजय लोखंडे आणि शुभम खैरनार यांच्यामार्फत हे प्रश्न हरियाणातील गुरुग्राम येथील यश यादव याच्याकडे पाठवले. तेथून हे प्रश्न जयपूरमधील मांगीलाल बिवाल, दिनेश बिवाल व विकास बिवाल यांच्यापर्यंत वितरीत झाले.
अशा प्रकारे कागदाच्या कपट्यांवर प्रश्न लिहिणे, आठवून नोट्स तयार करणे आणि मध्यस्थांच्या नेटवर्कद्वारे कोचिंग क्लास मालक व दलालांपर्यंत प्रश्न पोहोचवणे, असा संपूर्ण कट रचला गेला होता. या संपूर्ण साखळीचा पर्दाफाश सीबीआयने सादर केलेल्या तांत्रिक पुरावे आणि हस्तलिखित नोट्सच्या आधारे केला आहे.या प्रकरणामुळे नीट परीक्षेतील पारदर्शकतेवर प्रश्नचिन्ह उपस्थित केले जात आहेत.
