मुंबई : शिवसेना ठाकरे गटातील आमदार आणि नगरसेवकांना आपल्या गटात घेण्यासाठी शिंदे गटाकडून प्रयत्न सुरू असल्याच्या चर्चांना सध्या राजकीय वर्तुळात जोर आला आहे. या पार्श्वभूमीवर शिवसेना ठाकरे गटाचे पक्षप्रमुख उद्धव ठाकरे यांनी मातोश्रीवर विभागप्रमुख आणि वरिष्ठ नेत्यांची बैठक घेतली. आगामी दसरा मेळाव्याच्या तयारीसह पक्षातील राजकीय परिस्थितीवर या बैठकीत चर्चा झाल्याची माहिती आहे.
या बैठकीदरम्यान दादर-माहिमचे आमदार महेश सावंत यांनी ‘ऑपरेशन टायगर’बाबत पक्षाला माहिती दिल्याचा दावा केला. ठाकरे गटातून शिंदे गटात गेलेले काही नेते किंवा कार्यकर्ते सध्या ठाकरे गटातील आमदार आणि नगरसेवकांशी संपर्क साधण्याचा प्रयत्न करत असल्याचे सावंत यांनी बैठकीत सांगितले.
बैठकीनंतर माध्यमांशी बोलताना सावंत यांनी सांगितले की, काही व्यक्ती आमदार आणि नगरसेवकांना फोन करून संपर्क साधत आहेत. याबाबत उद्धव ठाकरे यांना माहिती देण्यात आली असून, अशा प्रकारचे फोन किंवा संदेश आल्यास त्यांची नोंद आणि रेकॉर्डिंग करून ठेवण्याच्या सूचना उद्धव ठाकरे यांनी दिल्याचे त्यांनी सांगितले.
ठाकरे गटातील एकही आमदार किंवा नगरसेवक पक्ष सोडणार नसल्याचा विश्वासही सावंत यांनी व्यक्त केला. पक्षात फूट पाडण्यासाठी किंवा कार्यकर्त्यांमध्ये संभ्रम निर्माण करण्यासाठी अशा चर्चा पसरवल्या जात असल्याचा दावा त्यांनी केला.
दरम्यान, बैठकीत मतदारयादी आणि एसआयआर प्रक्रियेबाबतही सावध राहण्याच्या सूचना देण्यात आल्याचे सांगण्यात आले. आगामी दसरा मेळाव्याच्या तयारीलाही बैठकीत महत्त्व देण्यात आले. शिवतीर्थावर दसरा मेळावा आयोजित करण्यासाठी ठाकरे गटाने मुंबई महापालिकेकडे अर्ज केला असल्याचे सावंत यांनी सांगितले.
आपल्या माहितीनुसार, सध्या ठाकरे गटाव्यतिरिक्त अन्य कोणत्याही पक्षाने शिवाजी पार्कसाठी अर्ज केलेला नाही. त्यामुळे यंदाचा दसरा मेळावा शिवतीर्थावर घेण्यास परवानगी मिळेल, असा विश्वास त्यांनी व्यक्त केला.
‘ऑपरेशन टायगर’च्या चर्चांमुळे महाराष्ट्राच्या राजकारणात वातावरण तापलेले असतानाच ठाकरे गटानेही पक्षांतर्गत हालचालींवर लक्ष ठेवण्यास सुरुवात केली आहे. त्यामुळे आगामी काळात या राजकीय दाव्यांमध्ये कितपत तथ्य आहे, हे पाहणे महत्त्वाचे ठरणार आहे.
