पाचगणी : इंदापूर तालुक्यातील वालचंदनगर पोलीस ठाणे आणि भिगवण पोलीस ठाण्याचे प्रभारी अधिकारी म्हणून यशस्वीपणे कामगिरी करुन विविध पुरस्कार मिळवणारे सहाय्यक पोलीस निरीक्षक दिलीप गोविंद पवार यांनी शनिवारी (दि.१७) पाचगणी पोलीस ठाण्याचा पदभार स्वीकारला.
पवार यांची खात्यांतर्गत बदली झाली असून, सध्या भिगवण पोलीस ठाण्याचा प्रभारी अधिकारी म्हणून त्यांच्याकडे पदभार होता. दिलीप पवार यांनी इंदापूर तालुक्यातील या दोन्ही पोलीस ठाण्यात मिळून जवळपास पाच वर्षांचा कार्यकाळ पूर्ण केला आहे. हसतमुख चेहरा, कर्तव्य तत्पर अधिकारी म्हणून दिलीप पवार यांची ओळख आहे.
इंदापूर तालुक्यातील वालचंदनगर आणि भिगवण या दोन्ही पोलीस ठाण्यामध्ये त्यांनी कौतुकास्पद कामगिरी केल्याने पोलीस खात्याकडून त्यांना विविध पुरस्काराने गौरविण्यात आले आहे. एकंदरीत पाच वर्षांच्या कालखंडात या दोन्ही पोलीस ठाण्यामध्ये त्यांनी कायदा सुव्यवस्था राखण्याबरोबरच गुन्हेगारी मोडून काढण्याचा प्रयत्न केल्याने एक कर्तव्यदक्ष अधिकारी म्हणून त्यांची ओळख निर्माण झाली.
