मुंबई : मुबंईत पुन्हा एकदा बॉम्बस्फोट घडवून आणण्याची धमकी देणारा ई-मेल आल्याने संपूर्ण शहरात एकच खळबळ उडाली आहे. या ई-मेलमध्ये मुंबईच्या महापौरांच्या कार्यालयासह शहरातील अतिशय महत्त्वाच्या अशा 5 ठिकाणांना लक्ष्य करण्याची धमकी देण्यात आली आहे.
आज सकाळी हा ई-मेल प्राप्त झाला. यामध्ये ‘खलिस्तान बोलेगा मुंबई जिंदाबाद’ असा मजकूर लिहिलेला असून, महापौर कार्यालय, मुंबईतील बँका, न्यायालय, अभिनेते अमिताभ बच्चन यांचा बंगला, महालक्ष्मी रेसकोर्स आणि छत्रपती शिवाजी महाराज आंतरराष्ट्रीय विमानतळ ही ठिकाणे बॉम्बने उडवून देण्याचा इशारा देण्यात आला आहे.
विशेष म्हणजे, अशा प्रकारचा धमकीचा ई-मेल येण्याची ही 3 री वेळ आहे. यापूर्वी 2 आठवड्यांपूर्वीदेखील महापौर कार्यालय उडवून देण्याची धमकी मिळाली होती. वारंवार येणाऱ्या या ई-मेल्समुळे सुरक्षा यंत्रणांची मोठी धावपळ होत आहे.
हा संदेश मिळताच मुंबई महानगरपालिका मुख्यालयात आणि महापौर कार्यालयाच्या परिसरात सुरक्षा व्यवस्था अत्यंत कडेकोट करण्यात आली. तातडीने बॉम्बशोधक व नाशक पथकाला पाचारण करून संपूर्ण परिसराची कसून झाडाझडती घेण्यात आली. मात्र, या तपासणीत कोणतीही संशयास्पद वस्तू आढळून आली नाही. त्यामुळे सर्व यंत्रणांनी सुटकेचा निश्वास सोडला.
कोणतीही घातपाताची वस्तू सापडली नसली, तरी सर्व तपास यंत्रणा सतर्क राहून परिस्थितीवर बारीक लक्ष ठेवून आहेत. सतत धमक्यांचे हे ई-मेल नेमके कोठून पाठवले जात आहेत आणि यामागे कोणाचा हात आहे, याचा छडा लावून आरोपींच्या मुसक्या आवळण्याचे मोठे आव्हान आता मुंबई पोलिसांसमोर उभे राहिले आहे.
