पुणे : पुण्यातील दहीहंडी उत्सवात सांस्कृतिक कार्यक्रमांच्या नावाखाली झालेल्या बीभत्स नृत्यांवर पोलिसांनी अखेर धडक कारवाई सुरू केली आहे. याप्रकरणी नृत्यांगनांसह संबंधित दहीहंडी मंडळांच्या अध्यक्षांवर आणि पदाधिकाऱ्यांवर गुन्हे दाखल करण्यात आल्याने नियम मोडणाऱ्यांचे धाबे दणाणले आहेत.
सहकारनगर पोलीस ठाण्यात प्रसिद्ध नृत्यांगना निशा मुंबईकर आणि शुभांगी थोरात यांच्यासह सुमारे आठ महिला कलाकारांवर गुन्हा नोंदवण्यात आला आहे. यापूर्वी प्रसिद्ध डान्सर राधा पाटील हिच्यावरही कारवाई करण्यात आली होती. केवळ कलाकारांवरच नाही, तर अश्लीलतेला खतपाणी घालणाऱ्या आणि सुरक्षेचे नियम धाब्यावर बसवणाऱ्या आयोजकांनाही या प्रकरणात सहआरोपी करण्यात आले आहे.
मुंबई, पुणे आणि नवी मुंबईतील काही ठिकाणी दहीहंडी उत्सवा दरम्यान मोठ्या प्रमाणावर गर्दी जमली होती. या उत्सवाचे औचित्य साधून काही मंडळांनी डान्स परफॉर्मन्स आयोजित केले होते. मात्र, या कार्यक्रमांमध्ये मर्यादांचे उल्लंघन करत अश्लील गाण्यांवर बीभत्स हावभाव आणि नृत्य करण्यात आल्याचा आरोप आहे. या प्रकारांचे व्हिडिओ समोर आल्यानंतर राज्यभरातून तीव्र संताप व्यक्त केला जात होता.
सण-उत्सवांचे पावित्र्य आणि परंपरा जपली पाहिजे, अशी मागणी नागरिकांमधून केली जात होती. याची दखल घेत पुणे पोलिसांनी तपासाची चक्रे वेगाने फिरवली आहेत. विनापरवाना कार्यक्रम घेणे, अटी व शर्तींचा भंग करणे आणि सुरक्षेची काळजी न घेणे या सर्व बाबींची पोलीस आता सखोल चौकशी करत आहेत. या कठोर पाऊलांमुळे आगामी काळात उत्सवांमधील गैरप्रकारांना आळा बसेल, अशी अपेक्षा व्यक्त केली जात आहे.
