पुणे: पुण्यात रिक्षातून प्रवास करणाऱ्या ज्येष्ठ नागरिकांना हेरून त्यांचे सोन्याचे दागिने चोरणाऱ्या आंतरजिल्हा टोळीचा समर्थ पोलिसांनी पर्दाफाश केला आहे. जळगावहून पुण्यात येऊन चोरी करणाऱ्या या टोळीतील तीन सराईत आरोपींना पोलिसांनी अटक केली असून, त्यांच्याकडून सुमारे 15 लाख रुपये किमतीचे 10 तोळे सोन्याचे दागिने जप्त करण्यात आले आहेत. या प्रकरणातील गणेश उर्फ मेमरी हा आरोपी अद्याप फरार असून पोलिस त्याचा शोध घेत आहेत.
अटक केलेल्या आरोपींची नावे शाकीर जाकीर तेली (वय 29, रा. कात्रज), मोहसीन खान नूर खान (वय 31, रा. जळगाव) आणि इस्माईल उर्फ राजू शब्बीर शेख (वय 50, रा. जळगाव) अशी आहेत. हे आरोपी रिक्षामध्ये प्रवासी म्हणून बसायचे आणि ज्येष्ठ नागरिकांच्या हालचालींवर लक्ष ठेवून संधी साधत दागिने लंपास करायचे.
14 जून रोजी एका ज्येष्ठ महिलेने पॉवर हाऊस चौक ते भवानी पेठदरम्यान रिक्षाने प्रवास केला होता. यावेळी आरोपींनी संगनमत करून महिलेच्या गळ्यातील 25 ग्रॅम वजनाची सोनसाखळी चोरली. याप्रकरणी समर्थ पोलिस ठाण्यात गुन्हा दाखल करण्यात आला होता. तपासादरम्यान पोलिसांना ही टोळी जळगावहून पुण्यात येऊन ज्येष्ठ नागरिकांना लक्ष्य करत असल्याची माहिती मिळाली.
माहितीच्या आधारे पोलिसांनी सापळा रचून शाकीर तेली याला कात्रजमधून ताब्यात घेतले. चौकशीत त्याने आपल्या साथीदारांची माहिती दिली. त्यानंतर 2 सप्टेंबर रोजी मोहसीन खान आणि इस्माईल शेख हे चोरीच्या उद्देशाने मालधक्का चौकात आले असताना पोलिसांनी त्यांना पकडले.
चौकशीत आरोपींनी सिंहगड रस्ता, काळेपडळ, वानवडी, बंडगार्डन तसेच पिंपरी-चिंचवड परिसरात रिक्षातून प्रवास करणाऱ्या ज्येष्ठ नागरिकांना लक्ष्य केल्याची कबुली दिल्याचे पोलिसांनी सांगितले. ही कारवाई पोलिस उपायुक्त ऋषिकेश रावले, सहाय्यक पोलिस आयुक्त सचिन हिरे, वरिष्ठ पोलिस निरीक्षक जयंत राजूरकर आणि पोलिस निरीक्षक (गुन्हे) चेतन मोरे यांच्या मार्गदर्शनाखाली करण्यात आली.
