Accident : परभणी जिल्ह्यातील जिंतूर तालुक्यात रविवारी संध्याकाळी घडलेला भीषण अपघात संपूर्ण मराठवाड्याला हादरवून गेला. चारठाणा जवळील गणेशपूर शिवारात भरधाव वेगातील ट्रॅव्हल्स बस आणि स्विफ्ट डिझायर कार यांच्यात समोरासमोर धडक होऊन एका कुटुंबातील 4 जणांचा मृत्यू झाला, तर आणखी 4 जण गंभीर जखमी झाले.
ही घटना 22 मार्च रोजी दुपारनंतर घडली. हिंगोली जिल्ह्यातील वसमत येथून मंठ्याकडे निघालेल्या कुटुंबाची ही कार (MH 12 GF 6259) समोरून येणाऱ्या ट्रॅव्हल्स (MH 20 DD 7666) ला धडकली. धडक इतकी जबरदस्त होती की कार तब्बल 50 ते 60 फूट दूर फेकली गेली आणि तिचा पूर्ण चुराडा झाला. एका आनंददायी कौटुंबिक भेटीचा प्रवास काही क्षणातच दुःखद अंतात बदलला.
या अपघातात कुटुंबातील 3 जणांचा जागीच मृत्यू झाला, तर आणखी एकाचा उपचारासाठी नेत असताना मृत्यू झाला. मृतांमध्ये महिलांचा आणि लहान सदस्यांचाही समावेश असल्याने ही घटना अधिक हृदयद्रावक ठरली आहे. जखमींवर सध्या रुग्णालयात उपचार सुरू असून काहींची प्रकृती गंभीर आहे. ट्रॅव्हल्समधील 13 प्रवाशांपैकी 4 ते 5 जण जखमी झाले.
