उरुळी कांचन : गणेशोत्सवाच्या पावन पर्वावर उरुळी कांचन शहरात हिंदू-मुस्लिम ऐक्याचे आणि सामाजिक सलोख्याचे एक अत्यंत सुंदर उदाहरण पाहायला मिळाले आहे. येथील ‘राइजिंग सोशल फाउंडेशन’ व मुस्लिम समाजाच्या वतीने गावातील तब्बल 30 गणेश मंडळांना धर्मवीर छत्रपती संभाजी महाराज यांची भव्य प्रतिमा भेट देऊन गणेशोत्सवाच्या शुभेच्छा देण्यात आल्या.
उरुळी कांचन हे शहर नेहमीच विविध सण आणि उत्सवांमध्ये हिंदू-मुस्लिम एकतेचे प्रतीक म्हणून ओळखले जाते. याच परंपरेला पुढे नेत, धार्मिक सलोखा अधिक दृढ व्हावा आणि समाजातील सर्व घटकांमध्ये परस्पर स्नेह वाढीस लागावा, या उद्देशाने हा आगळावेगळा उपक्रम राबवण्यात आला. गणेशोत्सव हा केवळ धार्मिक उत्सव न राहता समाजातील सर्व घटकांना एकत्र आणणारा उत्सव ठरावा, असा संदेश या उपक्रमातून देण्यात आला. या उपक्रमाचे गणेश मंडळांच्या पदाधिकाऱ्यांनी स्वागत केले.
या उपक्रमादरम्यान राइजिंग सोशल फाउंडेशनचे अध्यक्ष, उपाध्यक्ष, सचिव यांच्यासह सर्व सभासद व कार्यकर्ते मोठ्या संख्येने उपस्थित होते. मुस्लिम बांधवांनी दाखवलेल्या या आदरामुळे आणि दिलेल्या या भेटीमुळे सर्वच गणेश मंडळांच्या पदाधिकाऱ्यांनी व कार्यकर्त्यांनी या उपक्रमाचे मनापासून स्वागत करत आभार व्यक्त केले. या उपक्रमाचे संपूर्ण परिसरात कौतुक होत आहे.
