श्रीगोंदा : श्रीगोंदा तालुक्यातील कोळगाव येथील शिंदे मळा परिसरात चार ते पाच दरोडेखोरानी धारदार शस्त्राने हल्ला करून दाम्पत्याला गंभीर जखमी केले आहे. दरोडेखोरांनी घरातील दीड तोळ्यांचे सोन्याचे दागिने, १० हजार रुपयांची रोकड घेऊन फरार झाल्यची घटना घडली आहे. या घटनेत राजेंद्र विश्वनाथ लगड, गीता राजेंद्र लगड हे गंभीर जखमी झाले आहेत. ही घटना रविवारी पहाटेच्या सुमारास घडली आहे. याप्रकरणी राजेंद्र लगड यांनी वेलवंडी पोलिस ठाण्यात फिर्याद दिली आहे. त्यावरून पोलिसांनी अज्ञात दरोडेखोरांविरोधात गुन्हा दाखल केला आहे.
पोलिसांनी दिलेल्या माहितीनुसार, राजेंद्र लगड हे आपल्या कुटुंबासोबत घरात झोपलेले असताना रविवारी पहाटे चार ते पाच अज्ञात दरोडेखोरांनी घराचा आतून लावलेला दरवाजा कटावणीच्या साह्याने उघडण्याचा प्रयत्न केला. यावेळी लगड यांनी दरोडेखोरांना रोखण्याचा प्रयत्न केला. मात्र, दरोडेखोरांनी धारदार शास्त्राने लगड यांच्यावर वार करत घरात प्रवेश केला. घरातील मौल्यवान ऐवज कुठे ठेवला आहे, असे विचारत दोघांना लाकडी दांडक्याने बेदम मारहाण करण्यास सुरुवात केली.
घाबरलेल्या गीता लगड यांनी गळ्यातील तसेच कानातील सोन्याचे दागिने काढून दिले. मात्र, यावेळी एका कानातले निघत नसल्याने चोरट्यांनी त्यांच्या कानातील ओरबाडून काढले. तसेच राजेंद्र लगड यांच्या पेंटच्या खिशात असलेले दहा हजार रुपये बळजबरीने काढून घेतले. माधारी जाताना चोरट्यांनी खोलीचा दरवाजा बाहेरून बंद करत इतर खोल्यांकडे मोर्चा वळवला. त्यावेळी राजेंद्र लगड यांनी जोरजोरात आरडाओरडा सुरू केल्याने दरोडेखोरांनी तेथून पळ काढला.
दरम्यान, आरडाओरडा झाल्याने शेजारी राहणाऱ्या नागरिकांनी राजेंद्र लगड आणि गीता लगड यांना उपचारासाठी रुग्णालयात दाखल केले. या घटनेची माहिती मिळताच उपविभागीय पोलिस अधिकारी विवेकानंद वाखारे यांनी घटनास्थळी जाऊन पाहणी करून तपास करण्यासाठी सूचना दिल्या आहेत.
