मुंबई : महापौर रितू तावडे यांच्या सोशल मीडिया व्यवस्थापनावर होणाऱ्या मोठ्या खर्चामुळे पालिका वर्तुळात राजकीय वातावरण तापले आहे. महापौर कार्यालयाची समाजमाध्यमे हाताळण्यासाठी मुंबई महापालिका वर्षभरात 25 लाख 12 हजार 786 रुपये खर्च करणार आहे. यासाठी ‘मे. रनटाइम सोल्यूशन प्रा. लि.’ या खाजगी कंपनीची नियुक्ती करण्यात आली असून, हे कंत्राट 1ऑगस्ट 2026 ते 31 जुलै 2027 या एका वर्षाच्या कालावधीसाठी असणार आहे.
विशेष म्हणजे, सुरुवातीला 20 ऑगस्ट रोजी स्थायी समितीसमोर आलेला हा प्रस्ताव अवाढव्य खर्चामुळे मंजुरीविना पेंडिंग राहिला होता. मात्र, प्रशासनाने पुन्हा नव्याने मांडलेला हा प्रस्ताव 15 सप्टेंबर रोजी झालेल्या स्थायी समितीच्या बैठकीत कोणत्याही चर्चेशिवाय मंजूर करण्यात आला.
या निर्णयामुळे सत्ताधारी शिवसेनेने तीव्र आक्षेप नोंदवला असून, या प्रस्तावाचा फेरविचार करण्याची मागणी त्यांनी पालिकेच्या आयुक्तांकडे पत्राद्वारे केली आहे. महापालिकेचा हा निधीचा अपव्यय असून त्याला आपला विरोध असल्याचे शिवसेनेचे गटनेते अमेय घोले यांनी स्पष्ट केले.
दुसरीकडे, भाजपचे सभागृह नेते गणेश खणकर यांनी या वादावर आपली बाजू मांडली. “जर शिवसेनेचा या खर्चाला विरोध होता, तर त्यांनी बैठकीत त्यावर चर्चा का केली नाही?” असा थेट प्रश्न त्यांनी विचारला. या मुद्द्यावर शिवसेना आणि महापौरांशी चर्चा करून योग्य तो मार्ग काढला जाईल, असेही त्यांनी सांगितले.
