पुणे : शिक्षक भरती एमपीएससीच्या माध्यमातून करण्याचा शिक्षण विभागाचा प्रयत्न आहे. एमपीएससीमार्फत शिक्षक भरती करण्याचा प्रस्ताव शिक्षण आयुक्तालयाकडून शासनाला देण्यात आला आहे.
राज्यातील शिक्षक भरती एमपीएससीच्या माध्यमातून व्हावी. असा प्रस्ताव राज्याच्या शिक्षण आयुक्तांनी शासनाकडे पाठविला आहे. एमपीएससीचे शिक्षण सचिवही या प्रस्तावाबाबत सकारात्मक असल्याची माहिती मिळाली आहे. एमपीएससीमार्फत भरती प्रक्रिया करण्यासाठी नियमांमध्येही काही तांत्रिक बदल करण्याची गरज आहे. ‘महासरकार’ या ऑनलाईन न्युज पोर्टलने याबाबतची बातमी प्रकाशित केली आहे.
नियम बदलण्याची प्रक्रिया पूर्ण होईपर्यंत सध्या सुरू असलेली शिक्षक भरती पूर्ण केली जाईल, असे शिक्षण आयुक्त सूरज मांधरे यांनी सांगितले आहे. त्यामुळे येत्या काळात शिक्षक भरती होणार आहे, ती शिक्षक भरती एमपीएससीच्या माध्यमातून घेण्याचा शिक्षण विभागाचा प्रयत्न असेल. सध्या राज्यात पवित्र पोर्टलद्वारे शिक्षक भरती केली जाते.
दरम्यान, २०१९ मध्ये १२ हजार शिक्षकांची मोठी शिक्षक भरती करण्यात आली. राज्यात शिक्षकांची पदे मोठ्या प्रमाणात रिक्त असताना शिक्षक भरतीची मागणी वारंवार केली जात आहे.
