मुंबई: टीव्ही मालिकांमधील अभिनयामुळे घराघरांत पोहोचलेला अभिनेता रोहित चंदेल सध्या एका गंभीर गुन्ह्यामुळे अडचणीत आला आहे. २९ वर्षीय रोहितवर एका १६ वर्षांच्या अल्पवयीन मुलीचा लैंगिक छळ करत पाठलाग करणे, तिला त्रास देणे आणि मारहाण केल्याचा गंभीर आरोप आहे. या प्रकरणामुळे मनोरंजन सृष्टीत मोठी खळबळ उडाली असून मुंबई पोलिसांनी त्याला अटक केली आहे.
मिळालेल्या माहितीनुसार, रोहितने ‘काशीबाई बाजीराव बल्लाळ’ आणि ‘पांड्या स्टोअर’ सारख्या लोकप्रिय मालिकांमध्ये महत्त्वाच्या भूमिका साकारल्या आहेत. ५ जुलै रोजी त्याने पूर्व उपनगरातील एका इमारतीजवळ पीडित मुलीला गाठले, तिच्याशी वाद घातला आणि तिला मारहाण केली. याआधीही तो तिला वारंवार फोन करून मानसिक त्रास देत होता, अशी तक्रार मुलीच्या कुटुंबीयांनी पंत नगर पोलीस ठाण्यात दिली आहे. त्यानंतर पोलिसांनी तातडीने कारवाई करत गुन्हा दाखल केला.
आरोपी रोहित चंदेलवर पॉक्सो (POCSO) कायद्यासह भारतीय न्याय संहिता कलम ७८ आणि ११५ (२) अन्वये गुन्हा नोंदवण्यात आला आहे.तक्रार मिळताच पोलिसांनी शुक्रवारी दहिसर येथील त्याच्या राहत्या घरातून त्याला ताब्यात घेतले. विशेष पॉक्सो न्यायालयात हजर केले असता, न्यायालयाने त्याला पोलीस कोठडी सुनावली आहे. या प्रकरणाचा पुढील तपास पोलीस करत आहेत.
