मुंबई : रोहित शेट्टीच्या कॉप यूनिवर्सचा आगामी चित्रपट सिंघम अगेनची प्रेक्षक मोठ्या उत्सुकतेने वाट बघत आहे. बहुचर्चित ‘सिंघम अगेन’ चित्रपटातील पहिलं गाणं ‘जय बजरंगबली’ रिलीज करण्यात आलं आहे. चित्रपटाचा ट्रेलर रिलीज झाल्यापासून प्रेक्षकांनी उत्कंठा शिगेला पोहोचली आहे. आता सिंघम अगेन चित्रपटाचं पहिलं गाणं ‘जय बजरंगबली’ प्रदर्शिक करण्यात आलं असून ते प्रेक्षकांच्या चांगलंच पसंतीस उतरलं आहे. रिलीज झाल्यानंतर हे गाणं लगेचच ट्रेंडमध्ये आलं आहे.
‘जय बजरंगबली’ गाणं हनुमान चालिसापासून प्रेरित..
‘जय बजरंगबली’ गाणं हनुमान चालिसापासून प्रेरित असल्याचं दिसत असून या गाण्यामध्ये अजय देवगण, रणवीर सिंग आणि टायगर श्रॉफ यांच्यातील नात्याची झलक दिसून येत आहे. गाण्यात अभिनेता रणवीर सिंह म्हणजेच ‘सिम्बा’ हनुमानाच्या भूमिकेत असून तो गुंडांशी लढताना दाखवला आहे. यासोबतच या गाण्यात तो ‘सिंघम’ अजय देवगणला मिठी मारून त्याचा आशीर्वाद घेताना दिसत आहे. बाजीराव सिंघम आणि सिम्बाचं नातं राम आणि हनुमानाप्रमाणे दाखवण्यात आलं आहे.
‘जय बजरंगबली’ गाण्याला प्रेक्षकांच्या पसंतीस..
मल्टीस्टारर ‘सिंघम अगेन’ चित्रपटाचा घोषणा झाल्यापासून चाहते मोठ्या आतुरतेने वाट पाहत आहेत. रोहित शेट्टी दिग्दर्शित या पोलीस युनिव्हर्स चित्रपटात फुल्ल ऑन ॲक्शन आणि ड्रामा बघायला मिळणर आहे. या चित्रपटामध्ये अजय देवगणसोबतच रणवीर सिंह, अक्षय कुमार, टायगर श्रॉफ झळकणार आहेत. यामध्ये दीपिका पदुकोण लेडी सिंघमच्या भूमिकेत दिसणार असून अर्जुन कपूर आणि जॅकी श्रॉफ खलनायक म्हणून बघायला मिळणार आहे. सिंघम अगेन चित्रपट 1 नोव्हेंबरला चित्रपटगृहात प्रदर्शित होणार आहे.
