Rashmika and Vijay Wedding Date: दाक्षिणात्य सिनेसृष्टीतील चर्चेत असलेले कपल रश्मिका मंदाना आणि विजय देवरकोंडा यांच्या चाहत्यांसाठी एक आनंदाची बातमी समोर येत आहे. गेल्या अनेक काळापासून ज्यांच्या लग्नाची प्रतीक्षा होती, ते रश्मिका आणि विजय अखेर 2026 मध्ये विवाहबंधनात अडकणार आहेत. या जोडीने 3 ऑक्टोबर 2025 रोजी हैदराबादमध्ये अतिशय गुप्तपणे आपला साखरपुडा उरकला होता. आता या दोघांच्या विवाहाचा मुहूर्त आणि ठिकाण निश्चित झाले असून, 26 फेब्रुवारी 2026 ही तारीख त्यांच्या लग्नासाठी पक्की करण्यात आली आहे.
या शाही लग्नासाठी राजस्थानमधील उदयपूर येथील एका भव्य ऐतिहासिक राजवाड्याची निवड करण्यात आली आहे. विजय आणि रश्मिका यांना त्यांचे खाजगी आयुष्य प्रसिद्धीच्या झोतात आणायला फारसे आवडत नाही, म्हणूनच हा विवाह सोहळा मोजक्या पाहुण्यांच्या उपस्थितीत पार पडणार आहे. साखरपुड्याप्रमाणेच लग्नालाही फक्त जवळचे नातेवाईक आणि काही खास मित्रांनाच आमंत्रित केले जाणार आहे. उदयपूरमधील एका महालात या लग्नाची जय्यत तयारी सध्या सुरू असल्याची माहिती विश्वसनीय सूत्रांनी दिली आहे.
2018 मध्ये प्रदर्शित झालेल्या गीता गोविंदम या चित्रपटापासून दोघे रिलेशनशिपमध्ये आहे. त्यानंतर 2019 मधील डियर कॉम्रेड या सिनेमात त्यांनी पुन्हा एकत्र काम केले आणि तेव्हापासूनच त्यांच्या नात्याबद्दलच्या अफवांना बळ मिळाले होते.
येत्या फेब्रुवारी महिन्यात उदयपूरमध्ये पार पडणाऱ्या या सोहळ्यामुळे रश्मिका आणि विजयच्या चाहत्यांमध्ये उत्साहाचे वातावरण आहे. 26 फेब्रुवारी 2026 रोजी हे दोन्ही सुपरस्टार्स एकमेकांचे जोडीदार बनून आपल्या आयुष्याची नवीन सुरुवात करणार आहेत. अनेक वर्षांपासून रंगत असलेल्या या प्रेमप्रकरणाला आता लग्नाच्या बंधनाचे अधिकृत स्वरूप प्राप्त होणार आहे.
